Compostela, 21 de xuño do 2022 – Os condutores despedidos da antiga liña de bus ao aeroporto seguen reclamando a readmisión e Compostela Aberta reclama que se garanta a subrogación.
Compostela Aberta pide que se impulsen as medidas necesarias para a readmisión do persoal despedido en decembro de 2020 cando a anterior concesionaria deixou de prestar o servizo ao aeroporto. O concelleiro Jorge Duarte explicou que a UTE Trapsa-Aulusa, actual prestataria, “está a contratar persoal sen experiencia para a liña 6, no canto de recuperar aos traballadores despedidos”.
O concelleiro de compostela Aberta considera “ incomprensible que o Goberno siga sen mediar neste conflito, incumprindo todos os acordos plenarios e desoíndo todas as sentenzas xudiciais”.
Jorge Duarte defenderá no próximo Pleno unha moción na que insta ao Goberno a realizar as actuacións precisas para que a empresa concesionaria readmita ao persoal, dándolle cumprimento ás sentenzas xudiciais relativas a estes despedimentos.
Compostela Aberta demanda que o concello realice o “necesario control que impida que a liña de bus ao aeroporto sexa prestada por persoal alleo ou a través de contratacións puntuais; e garanta a incorporación dos traballadores despedidos no listado do persoal a subrogar licitación do transporte público”.
Por último, Compostela Aberta urxe ao Goberno a impulsar, a través de Tussa, un bus lanzadeira que conecte directamente a intermodal co aeroporto Rosalía de Castro, sen paradas urbanas e con tarifa diferenciada.
Comportamento cuestionable
Jorge Duarte explicou en rolda de prensa a postura de Compostela Aberta e criticou a actitude da empresa que considera moi cuestionable “a UTE Trapsa-Aulusa está a contratar persoal sen experiencia para cubrir a liña 6, co obxectivo de atender o reforzo da liña anunciado recentemente, e segue sen reincorporar aos traballadores despedidos por Freire en decembro de 2020, cando deixou de operar o servizo”.
O concelleiro é tamén moi crítico co equipo de goberno “hai menos xustificación para a actitude do Goberno de Bugallo, que leva ano e medio ignorando a situación do persoal, as numerosas sentenzas xudiciais que lles dá a razón aos traballadores, e tamén os acordos plenarios”.
O edil incidiu en que “o Goberno non pode seguir botando balóns fóra argumentando que o conflito é entre a empresa e os traballadores e que a nova concesionaria pode contratar a quen queira, porque o seu deber é mediar nesta situación cando falamos dun servizo que agora depende do Concello”.
Ademais, lembrou, “o Goberno está ignorando que o Pleno da Corporación aprobou xa dúas mocións de CA, a última hai xusto un ano, para conseguir a reincorporación do persoal”.