Compostela, 9 de novembro do 2022 – O grupo de Compostela Aberta asegura que o concello vai perder unha subvención de 370.000 euros, procedente dos fondos Next Generation.
A perda da subvención daríase por un erro no procedemento de adxudicación do contrato ao que ía destinada a axuda. A achega europea ía dirixida á implantación dunha nova estrutura de Centro de Proceso de Datos, e tal e segundo a mesa de contratación o Concello non poderá cumprir os prazos establecidos para xustificar a subvención ao ter que reiniciar a licitación.
A portavoz de CA, María Rozas, urxiu ao Goberno “a explicar como vai financiar agora este proxecto, en serio risco por unha nova entrega desta serie protagonizada por Bugallo e que leva por título A caída do mito dos bos xestores”.
O anuncio de licitación do servizo de implantación dunha nova estrutura de Centro de Proceso de Datos do Concello de Santiago foi publicado o 19 de setembro na Plataforma de Contratación do Estado, e o prazo para a presentación de ofertas finalizaba un mes despois. O 28 de setembro deuse conta dun erro material no prego técnico, relativo ao equipamento a suministrar por parte da adxudicataria.
Onde se indica que a empresa deberá ofertar “2 Switches de interconexión cada un dos cales disporá de 64 Gb RAM”, debería constar “4 Gb RAM”. Os pregos actualizados, incorporando esta corrección, foron publicados o 19 de outubro, o mesmo día no que finalizaba o prazo para a presentación de ofertas.
O 20 de outubro celebrouse a primeira Mesa de Contratación para resolver este procedemento, e os representantes da Intervención e da Asesoría Xurídica advirten que se efectuou un cambio no prego durante o prazo de presentación de ofertas que non pode considerarse simplemente a corrección dun erro material. Para analizar en profundidade as repercusións desta rectificación suspéndese a celebración da Mesa de Contratación, que volve reunirse o pasado 3 de novembro.
Na nova xuntanza, a Asesoría Xurídica e a Intervención Municipal volven considerar que a modificación efectuada no prego aprobado “supón unha vulneración das normas do procedemento de adxudicación do contrato e que habería que retrotraer as actuacións ata o momento da súa comisión”. É entón cando a presidenta da
Mesa advirte da imposibilidade de retrotraer o expediente, xa que non se podería adxudicar o contrato dentro do prazo establecido na convocatoria das subvencións europeas coas que se ía financiar o proxecto, “que obriga a que o sistema a contratar estea subministrado e recepcionado antes do 15 de decembro de 2022”. Por este motivo, declárase a desistencia no procedemento de adxudicación e, polo tanto, o Concello acaba renunciando a esa subvención de case 370.000 euros.
A portavoz de Compostela Aberta, María Rozas, denunciou que “esta non é a primeira subvención á que ten que renunciar o Concello neste mandato”, e urxiu ao Goberno de Bugallo a explicar “como vai acometer agora o proxecto para a implantación do novo Centro de Proceso de Datos, unha peza fundamental dentro do procedemento para a modernización da administración local que impulsamos xa desde o pasado mandato”.
