Compostela, 4 de maio do 2023 – O concello de Santiago ordenou a paralización da actividade, por falta de permisos, na nave que Desproi ten no polígono Costa Vella.
Trátase do edificio alugado pola concellaría de medio rural. Unha decisión que derivou na dimisión do concelleiro Joseá Manuel Pichel ao saberse que era accionista de Desproi.
Obras sen permiso
Compostela Aberta, que en xaneiro destapara o “Caso Pichel”, pide agora explicacións ao goberno local por esta nova irregularidade. A decisión de paralizar a actividade ven motivada por un informe emitido de oficio por un técnico municipal. O documento foi emitido no mes de marzo e a orde de paralización ten data de 17 de abril.
No informe recóllese que no edificio de Desproi executáronse obras sen título habilitante, e que as actividades que se desenvolven nel tamén carecen dese título municipal. O técnico dá conta da situación ao departamento de Disciplina Urbanística e advirte, ademais, que o uso de oficinas que se desenvolven no soto 2 do edificio non é legalizable.
O Decreto que ordena a paralización da actividade tamén recolle a incoación dun procedemento de reposición da legalidade urbanística alterada a Desproi, por desenvolver unha actividade sen título municipal habilitante, e concédelle á empresa un prazo de 15 días para presentar alegacións.
Compostela Aberta pide explicacións
A portavoz municipal de Compostela Aberta pediulle ao Goberno que explique se a empresa lle tén dado xa cumprimento aos requirimentos deste decreto. Para María Rozas, “este é un novo capítulo que sementa todas as dúbidas sobre o caso Desproi, e volve demostrar o que Compostela Aberta vén denunciando: que as responsabilidades non rematan no dimitido concelleiro Pichel”.
A concelleira insistiu en que “estas últimas informacións volven xerar dúbidas sobre a conveniencia de que o propio Goberno derive este expediente á Fiscalía, unha opción que descartou e que vinculou a un informe xurídico que Compostela Aberta tén solicitado e que seguen sen facilitarnos”.
