A festa máis Compostelana de Santiago engade a súa programación unha Romaría das Flores, no parque de Belvís o 31 de maio
A primeira edición da Romaría das Flores nace vinculada ás festas da Ascensión. Unha Romaría que se presenta variada; con actividades infantís, gastronómicas e musicais, unha festa que se estenderá entre a unha da tarde e as doce da noite
As bandas galegas De Ninghures, Tona e Ulex comparten cartel coas francesas Alvilda, os italianos The Peawees e o proxecto gaditano Yeli Yeli. As crianzas terán espazo e programación propia durante o día con propostas coma Uxía Lambona e a Banda Molona e Xogos Miudiño.
Esta primeira edición da “Romaría das Flores” recolle parte do espírito da querida “Romaría pop” cando se cumpriron xa dez anos da súa última edición.
Programación
A Romaría das Flores será o escenario no que se presenten en concerto Tona. Esta nova banda fai “música da ribeira”, sons populares que se reinventan nunha formación de acordeón, trikititxa, batería, baixo e a voz inconfundible de Miguel Cernadas (Terbutalina).
Tona actuarán no Parque de Belvís nas primeiras horas xusto despois doutro dos grupos que veñen de renovar o panorama musical galego, Ulex. Os composteláns presentan primeiro disco, “Lonxe de ti”. Rock atolondrado, como din eles, con aires cumbieiros e letras que poden ser a banda sonora da mocidade galega.
A tarde traerá dúas propostas que revisan as súas tradicións con novas sonoridades. Por unha banda chegan dende Cádiz a Compostela Yeli, Yeli, o proxecto do cantaor Álvaro Romero mestura a electrónica con batería en directo, a tradición do flamenco co kuduro.
Pola outra unha das bandas referentes da nova potente e rica escena actual en Galicia, De Ninghures, traerán ao parque de Belvís a frescura da súa ‘Feira’, novo disco e espectáculo que están a presentar esta primavera.
Xa á tardiña o power pop das francesas Alvilda sorprenderá coa mestura de melodías luminosas, guitarras punk e un particular toque yeyé. Poránnos a bailar xusto antes de que o cuarteto italiano The Peawess peche os concertos da Romaría das Flores co seu garaxe rock e os seus vinte anos de traxectoria que os converten nunha das bandas de referencia do seu estilo na escena europea. A festa rematará cando erga a agulla do último vinilo do día a picadiscos Wanda Buluba.
Ao par dos concertos o Parque de Belvís contará tamén durante a xornada cun espazo de lecer para crianzas dinamizado por Xogos Miudiño e cun concerto despois do xantar de Uxía Lambona e a Banda Molona.
A “Romaría das Flores” está organizada polo Concello de Santiago, coa produción de Tremendo Audiovisual, co patrocinio principal de Deleite e co apoio de Estrella Galicia, Bodegas Lodeiros e Paco & Lola.
