Padrón, 12/06/2026 – O Plan Especial de Reparación e Conservación de Estradas que o Ministerio de Transportes está levando a cabo chegou a Padrón para mellorar a N-550. O obxectivo do Plan é reparar os danos provocados polos temporais do inverno nas estradas galegas competencia do Estado.
O delegado do Goberno en Galicia, Pedro Blanco, e o alcalde de Padrón, Anxo Arca, supervisaron o inicio dos traballos de asfaltado na N-550. Estiveron acompañados do xefe da Demarcación de Estradas do Estado na provincia da Coruña, Francisco Prego, e pola tenente de alcalde de Padrón, Chus Campos.
Na visita ás obras, o delegado do Goberno explicou que os traballos constan dun orzamento de 500.000 euros para o tramo padronés da N-550 e da N-550a. Destinaranse 300.000 para a reparación máis urxente e 200.000 para actuacións puntuais e de mantemento. As obras que se están a executar consisten fundamentalmente no fresado e reposición do firme, co obxectivo de mellorar as condicións de circulación e reforzar a seguridade.
Unhas obras “moi necesarias nunha vía de comunicación importantísima para Padrón e para Galicia”, destacou o alcalde, que se amosou moi agradecido “por ver as máquinas xa traballando”. As obras na N-550 durarán “en torno a tres semanas ou un mes se o tempo acompaña e non hai incidencias”.
Os traballos empezaron na circunvalación e seguirán desde a rotonda do Hotel Scala en dirección cara a Santiago. A continuación, está previsto que as obras de mellora continúen tamén na N-550a, a antiga nacional, desde a mesma rotonda e ata a ponte de Pontecesures.
Os traballos de mellora do firme da N-550 ao seu paso por Padrón forman parte das obras de emerxencia que o Ministerio de Transportes e Mobilidade Sostible executa nas estradas galegas das catro provincias para reparar os danos provocados polos temporais do inverno, realizadas dentro do Plan Especial de Estradas en Galicia, dotado con 167 millóns de euros e que deixa en Padrón 500.000 euros para a mellora do seu tramo da N-550 e da N-550a.
Na súa visita ao municipio padronés, Blanco subliñou que este Plan Especial mobiliza 38 millóns de euros extraordinarios que, sumados ao investimento ordinario, “permiten alcanzar en 2026 a cifra récord de 167 millóns destinados á conservación das estradas do Estado en Galicia, o maior investimento anual da historia recente”.
Melloras na travesía da N-550 por Padrón
En paralelo a estas melloras, Pedro Blanco e Anxo Arca lembraron que o Ministerio de Transportes investirá 3 millóns de euros para transformar a travesía da N-550 en Padrón, entre A Ponte e o centro da vila. As obras converteran esta estrada nunha zona máis segura e adaptada a novas formas de mobilidade, “cumprindo cunha demanda histórica do Concello e da veciñanza”.
En declaración aos medios de comunicación, subliñaron que esta actuación creará unha vía segura e accesible, con espazo para os peóns, carril bici, zonas verdes e mobiliario urbano, que se estenderá ao longo de case un quilómetro entre o centro urbano e o límite coa provincia de Pontevedra.
