Compostela, 19 de agosto do 2024 – O concello de Santiago de Compostela ven de rematar a reparación do firme en nove rúas da cidade a través do departamento municipal de Vías o Obras.
En todas estas rúas tíñanse detectado importantes desperfectos e deterioro que se consideraron prioritarias desde o punto de vista técnico. Os traballos realizados foran presentados na pasada primavera polo concelleiro responsable do departamento, Xesús Domínguez.
Esta rehabilitación de firme realizouse na rúa da Presa, rúa do Campo de Santa Isabel, rúa de Vite de Abaixo, avenida do Burgo das Nacións, rúa de Pilar Miró, rúa do Tambre, rúa de San Caetano, rúa das Casas da Hedra e travesa das Casas da Hedra.
Os traballos foron executados nos últimos meses xa que tiveron que agardar a que as condicións meteorolóxicas foran máis propicias.
En total, o Concello destinou a estas intervencións un orzamento de 358.535 euros, co que cubriu as actuacións previas á pavimentación, a xestión de residuos e medidas de seguranza, ademais da aplicación do firme. Nestes días estase procedendo a traballos de pintado nalgúns dos tramos en que se interveu.
Estas actuacións complementáronse con outros labores de mantemento e conservación de firmes asfálticos, consistentes tanto en pequenos bacheos repartidos por toda a cidade como en parcheos amplos na rúa Churruchao, rúa Cantaleta, avenida de Barcelona, rúa Polonia e acceso á rúa Polonia desde a SC-20.
