Compostela, 26 de decembro do 2022 – Un ano despois de denunciar ante a inspección de traballo os problemas no Psiquiátrico de Conxo a CIG lembra que no se tomaron medidas e que os problemas continúan.
O pasado mes de outubro Inspección de Traballo requiríalle á Xerencia da Área sanitaria que adoptara medidas médicas e organizativas. O sindicato CIG denuncia que no canto de atender a demanda o que tratan de facer co Psiquiátrico é “invisibilizar as deficiencias e non presenta un proxecto real no que definan cambios substanciais tanto a nivel estrutural, como organizativo e médico”.
CIG-Saúde de Santiago e Barbanza acusa á xerente, Eloíña Ñúñez, de “seguir instalada na súa política de anuncios e propaganda, que non se traduce en medidas reais”. Como exemplo, expoñen o investimento anunciado de medio millón de euros dentro dun Plan de Saúde Mental da área sanitaria “que se esqueceron de deseñar, e que ninguén sabe onde foron invertidos os cartos”.
Agresións físicas
Os problemas agrávanse e desde o sindicato explícase que en un mes chegaron a producirse tres agresións ao persoal na mesma unidade nun só mes, debido á falta de persoal para os coidados necesarios.
Tampouco, din, hai un proxecto real de cambio estrutural, organizativo e médico. CIG denuncia que desde a Xerencia non se lle avalía a xefatura o xefe de servizo, permitindo que leve anos nunha situación irregular, non crea un plan de garantía de calidade e plan funcional para o Hospital Psiquiátrico que defina recursos materiais necesarios e dotación de recursos humanos coa creación dun plan de necesidades de persoal.
As salas non contan con persoal suficiente e de todas as categorías, non se estabilizan prazas, chegando a extremos de quedar quendas con dúas TCAE para 20 pacientes que precisan especial coidado. E non se fai un plan de formación especifico e axeitado ao que poida acceder todo o persoal, fixo e contratado, centrado no coidado das usuarias/os e que desnaturalice a contención mecánica.
Non se crean equipos multidisciplinares formados por todo o persoal das diferentes categorías das unidades, para poder traballar nun coidado integral das/os usuarias/os. Nin protocolos internos que favorezan a planificación e organización do traballo diario, como protocolo de traslados e acompañamento de pacientes, guía de acollida do persoal de nova incorporación, protocolos asistenciais, …
A Xerencia tampouco ten en conta a opinión e as achegas que poidan ter as traballadoras por medio de reunións formais para a mellora das deficiencias.
Xunto a isto, non modifica o sistema de desbotamento de roupa sucia que se fai a través dun oco común entre as plantas, provocando risco de caída a distinto nivel de ata catro metros;non proporciona a uniformidade o persoal dende fai máis de dous anos; e nin sequera obriga a empresa concesionaria do servizo de limpeza a cumprir co prego de condicións, vulnerando así a hixiene básica, como por exemplo non limpándose os cuartos de baño de zonas comúns nas quendas de tarde.
