Ás 16.03 horas de onte domingo comezou o inverno boreal, que se prolongará ata o 20 de marzo ás 15.46 horas. O inicio da nova estación ten como consecuencia que fora o día máis curto do ano cunha duración de pouco máis de 9 horas na nosa latitude e que o Sol alcance na culminación a menor altura posible.
Porén, as tardes xa comezaron a medrar dende o pasado día 7, mentres que as mañás seguirán minguando este inverno ata comezos de ano. “Isto débese -explica o coordinador científico do Observatorio Astronómico Ramón María Aller da USC, José Ángel Docobo, a que a hora oficial está baseada no chamado Sol medio, punto que vai reproducindo as posicións medias do Sol ao longo do ano dado que a nosa estrela se despraza aparentemente con velocidade variable”.
Fenómenos salientables
O inverno traerá hoxe a choiva de estrelas Úrsidas, e na noite do 3 ao 4 de xaneiro terá lugar o máximo das Cuadrántidas (con radiante preto da Osa Maior), unha das máis activas do ano. Tamén o día 3 ás 18.00 horas pasará a Terra polo perihelio, mínima distancia ao Sol (147 millóns de km.)
Un novo ciclo para os chineses
Este 2025 remata dun xeito especial na cultura chinesa e xaponesa (que asumiu o calendario chinés). Coa entrada do solsticio de inverno remata un ciclo de 60 anos, Yin, e comeza outro, Yang.
O calendario chinés usa ciclos de 60 anos denominados Jia Zi. Combinan 12 animais do zodíaco cos 5 elementos (madeira, fogo, terra, metal e auga). Isto produce 60 combinacións únicas que se repiten.
Onte domingo rematou un de eses ciclos de 60 anos. Na cultura chinesa considerase un fito moi importante xa que marca o inicio dunha nova etapa de sabedoría e experiencia.
A relación de China e Xapón coa USC en particular, e con Galicia en xeral, mantense co paso dos anos e ben está que lembremos cousas que suceden só cada sesenta anos e que para eles son importantes así que boa entrada en esta nova etapa vital.
