Trátase de algo que acompaña a esta sociedade desde hai tempo e aínda hai quen debate sobre que tipo de enfermidade é, si é real ou como afecta ás persoas. Por sorte a maioría da sociedade comeza a entender que a depresión é unha situación que require de axudas, profesionais e tempo para ser superada.
Silleda, dentro do Plan Municipal de Saúde Mental, organiza esta charla sobre a depresión o vindeiro xoves día 22 de xaneiro na Casa do Concello ás 18:00 horas, aberta a toda a veciñanza e persoas interesadas
A actividade coincide co Día Mundial contra a Depresión, que se conmemorou este martes. Unha xornada destinada a visibilizar un trastorno de saúde mental que afecta a millóns de persoas en todo o mundo e que, en moitos casos, continúa rodeado de estigmas e incomprensión.
A depresión vai moito máis alá da tristeza puntual, podendo provocar un impacto significativo na vida persoal, familiar, social e laboral das persoas que a padecen, polo que resulta fundamental favorecer a información, a prevención e o acceso ao apoio axeitado.
Baixo o lema “Depresión, máis alá da tristeza: que é o que podemos facer”, esta sesión pretende poñer o foco na importancia da saúde mental e ofrecer ferramentas básicas para comprender este trastorno, detectar sinais de alerta e saber como actuar ou acompañar ás persoas afectadas.
O Concello de Silleda destaca neste ámbito por ser un dos primeiros municipios en contar cun Plan Municipal de Saúde Mental propio, promovendo a participación da veciñanza e a creación de espazos seguros para compartir experiencias e recibir apoio.
A sesión será impartida por persoal especializado da asociación FEAFES Galicia (Federación de Asociacións de Familiares e Persoas con Enfermidade Mental de Galicia), entidade á que o Concello agradece a súa colaboración na implantación deste programa municipal.
Desde o Concello de Silleda anímase á cidadanía a inscribirse ata o propio día da sesión a través do teléfono 986 59 20 37.
Pola súa banda, a concelleira de Benestar, Ángela Troitiño, subliña que “a saúde mental é un piar básico no benestar das persoas, e está na man de todos e todas comprendela, normalizala e tratala coa importancia que merece”.
