Galicia logra para o CESGA unha fábrica europea de intelixencia artificial (IA) cun orzamento de 82 M€ que acelerará a investigación e a innovación no ambito da saúde
O conselleiro de Ciencia, Román Rodríguez, e a presidenta do CSIC, Eloísa del Pino, celebran como un fito histórico a concesión ao Cesga da fábrica de IA. A solicitude fora realizada pola Xunta e o CSIC, é a segunda de España e unha das 13 da Unión Europa.
En palabras de Román Rodríguez “É un importantísimo proxecto, que vincula as áreas da biotecnoloxía e a intelixencia artificial e que nos sitúa na elite neste ámbito en Europa”.
O Conselleiro felicita ao equipo do Cesga e agradece a participación do CSIC, a implicación dos ministerios de Ciencia e de Transformación Dixital e o apoio de máis de 60 entidades Galicia e logra captar 65 M€ para o seu sistema de investigación e innovación (41 de fondos europeos e 24 estatais) que completará con 17 M€ de fondos propios
A iniciativa inclúe a adquisición de infraestruturas de supercomputación avanzadas e unha plataforma experimental de IA optimizada. A fábrica de IA permitirá impulsar a creación e fortalecemento de startups, mellorar a competitividade das empresas, atraer talento e crear emprego
A fábrica de IA do CESGA
O conseguido polo CESGA é unha das seis novas fábricas europeas de intelixencia artificial que estará centrada no ámbito da saúde e contará cun investimento de 82 M€.
Así o notificou hoxe a Empresa Común de Computación de Altas Prestacións Europea (EuroHPC JU), unha iniciativa conxunta entre a UE, distintos países e socios privados ante a que a Xunta de Galicia e o Consello Superior de Investigacións Científicas (CSIC) presentaron en xuño unha candidatura para acoller unha infraestrutura desta tipoloxía.
Actualmente hai un total de 13 factorías con sede en 12 países (Alemaña, Austria, Bulgaria, Eslovenia, España, en Barcelona; Finlandia, Francia, Grecia, Italia, Luxemburgo, Polonia e Suecia), ás que se suman agora as novas seis fábricas que veñen de concederse en todo o continente, unha delas en Galicia.
A concesión deste proxecto ao Centro de Supercomputación de Galicia (Cesga) supón que Alemaña, España e Polonia sexan os tres únicos países que contan con dúas fábricas de IA no seu territorio, algo que sitúa a Galicia nunha posición relevante no eido das tecnoloxías profundas e biotecnoloxía.
Esta fábrica de IA estará centrada no ámbito da saúde baixo o nome 1HealthAI. Grazas a ela, adquiriranse un novo supercomputador específico para intelixencia artificial e unha plataforma de supercomputación avanzada optimizada para IA experimental e prestaranse servizos de apoio integral a empresas e centros de investigación de xeito gratuíto.
A Comunidade galega logra captar 65 millóns de euros para o seu sistema de investigación e innovación (41 de fondos europeos e 24 estatais) que a Xunta completará con outros 17 millóns de euros de fondos propios. Esta capacidade de captación evidencia, en opinión do conselleiro, o posicionamento e a forza dunha I+G+i cada vez máis relevante.
