O grupo socialista urxe á xunta a realizar unha reforma integral do centro de saúde de Padrón e solucionar as múltiples eivas do edificio
As infraestruturas sanitarias na bisbarra teñen en moitos casos moitos anos e comezan a pedir arranxos serios e non só reparacións puntuais. Negreira, Dodro ou mesmo o psiquiátrico de Conxo en Compostela, que despois de anos de solicitalo ven de rematar as obras, levaban tempo pedindo arranxos e seguen a facelo.
En moitos casos as denuncias acaban no Parlamento de Galicia e agora o Psoe leva a ese foro ao centro de saúde de Padrón. A deputada Patricia Iglesias advertiu da necesidade de ampliar espazos asistenciais e zonas comúns e de acometer melloras en accesibilidade e eficiencia enerxética
A deputada citou, entre outros problemas que presenta o edificio, filtracións de auga, humidades, falta de ventilación, pavimentos deteriorados, ocos no falso teito ou fiestras estragadas, que representan “un desgaste xeneralizado”
Iglesias reclamoulle á Xunta de Galicia unha reforma integral do centro de saúde de Padrón para dotalo das infraestruturas e medios necesarios para garantir unha atención sanitaria de calidade. Advertiu ademais da “urxencia” desa reforma, que debe incluír melloras na accesibilidade e na eficiencia enerxética, ademais dunha actualización tecnolóxica.
Patricia Iglesias recordou que o centro de saúde padronés soporta unha carga asistencial moi elevada, “que continúa medrando” tanto pola evolución demográfica como polo avellentamento da poboación dos municipios aos que da cobertura, tanto o propio de Padrón como outros da mesma comarca. Porén, as instalacións “non están á altura das necesidades actuais nin futuras”.
Unha demanda reiterada
A Deputada socialista lamentou que a reforma do centro de saúde non é unha demanda nova, senón reiterada “en múltiples ocasións pola veciñanza, polos profesionais sanitarios e polas distintas forzas políticas”. Sinalou tamén que a situación provocou manifestacións públicas, mais os compromisos por parte do Goberno do PP “non se materializan”.
