A Xunta vén de rematar as obras de renovación da cuberta do Colexio Plurilingüe Os Tilos, en Teo, cun investimento de preto de 400.000 €. O conselleiro de Educación, Ciencia, Universidades e FP, Román Rodríguez, visitou o centro co fin de comprobar o resultado das obras.
Estes traballos enmárcanse no Plan de nova arquitectura pedagóxica, a folla de ruta do Goberno galego para impulsar a modernización dos centros educativos, incrementar a súa eficiencia enerxética e mellorar o benestar da comunidade escolar.
Esta actuación supón unha mellora do confort deste edificio que empregan cada día máis de 233 alumnos. O Conselleiro lembrou que esta actuación se suma á rehabilitación integral en marcha no CEIP Plurilingüe A Igrexa-Calo, por un importe de máis de 900.000 €, o que eleva a arredor de 1,3 M€ os investimentos en infraestruturas educativas no concello de Teo.
Detalles da intervención
A obra no Colexio dos Tilos consistiu na substitución do material da cuberta actual, formado por tella cerámica, por unha de panel sándwich e illamento sobre forxado de cuberta.
En total, actuouse en preto de 2.100 m². Tamén se acometeu a substitución de lucernarios, a impermeabilización dos canlóns, a renovación de baixantes e canalóns e a impermeabilización dos petos perimetrais.
