Compostela, 24 de febreiro do 2024 – O Centro Dramático Galego e o colectivo portugués ASTA-Teatro e Outras Artes coproducen a montaxe ”Rosalía, cartografía de ásperas ortigas”.
Unha obra que serve para conmemorar o 188º aniversario do nacemento de Rosalía de Castro coa estrea do espectáculo o vindeiros 27 e 28 de febreiro no Cine-Teatro Avenida da localidade lusa de Castelo Branco.
A dirección escénica e dramaturxia é do compostelán Roberto Salgueiro. ”Rosalía, cartografía de ásperas ortigas” parte de textos e, sobre todo, versos da escritora tomados de Cantares Gallegos, Follas Novas e En las orillas del Sar.
O espectáculo está interpretado por Antía Cortegoso, Sérgio Novo, Alberto Medeiros e Marta Casais e nel cobra importancia o espazo sonoro achegado por varios instrumentos, as coreografías interpretadas polo elenco e un espazo escénico cuberto de flores.
Despois da súa estrea en Castelo Branco, ”Rosalía, cartografía de ásperas ortigas” representarase noutras dúas localidades lusas: Covilhã (Teatro Municipal, do 6 ao 8 de marzo) e Gouveia (Cine-Teatro, 29 de marzo).
O Salón Teatro de Santiago de Compostela, sede do Centro Dramático Galego, que xa acolleu parte dos ensaios no mes de xaneiro, ofrecerá tres funcións do espectáculo do 26 ao 28 de abril.
Con este proxecto o CDG continúa a impulsar e participar en proxectos compartidos con compañías e profesionais do país veciño, nunha ampla e intensa actividade común da que forman parte nos últimos anos espectáculos como Frágua de amor, Manuela Rey Is In Da House, Territórios de liberdade, Entrepalav-bras, Na hora dos cans ou Ifixenia, entre outros.
