Compostela, 8 de xaneiro do 2024 – O Salón Teatro de Compostela acolle este venres a estrea de “Frágua de amor”, unha coprodución entre o Centro Dramático Galego, CDG, e seis estruturas culturais lusas: Escola da Noite-Grupo de Teatro de Coímbra, O Bando de Surunyo, Artway, Cendrev-Teatro García de Resende, Teatro Académico de Gil Vicente e Teatro Nacional São João.
“Frágua de amor” está apoiado polo Instituto Camões-Centro Cultural Portugués de Vigo e forma parte do ciclo de teatro en lingua portuguesa Quintas do Camões promovido polo Instituo . O CDG abre a programación 2025 con esta peza a partir das 20,00 h. de este venres.
A obra é un clásico da literatura portuguesa, escrito polo dramaturgo Gil Vicente. Esta montaxe está dirixida por António Augusto Barros e conta coa música en directo de O Bando de Surunyo, especializado na interpretación de obras dos séculos XVI e XVII, con seis voces, laúde, viola de gamba, frauta e percusión baixo a dirección musical de Hugo Sanches e co galego Xurxo Varela á viola.
Sobre o escenario actuará un elenco de nove actores e actrices: Ana Teresa Santos, Carlos Meireles, Igor Lebreaud, Maria Quintelas, Miguel Magalhães, Nuno Meireles, Sérgio Ramos e a galega Mónica Camaño.
Crítica dos privilexios e os abusos
A posta en escena do texto escrito en 1524 para celebrar o casamento de João III con Catarina de Habsburgo consegue, a través da escenografía e da música, o ambiente de festa imaxinado por Gil Vicente en “Frágua de amor”.
A obra é ao mesmo tempo crítica cos temas habituais do autor: a igrexa, a xustiza corrupta e a fidalguía improdutiva que aspira a beneficios. Tras a súa estrea en Coímbra e o seu paso por Évora o pasado novembro, chega agora a Galicia antes de recalar no Teatro Nacional São João do Porto, onde se vai representar do 15 ao 18 de xaneiro.
Para a representación no Salón Teatro, función única, as localidades poden adquirirse xa de xeito anticipado na plataforma en liña de ataquilla, ou no portelo do número 34 da rúa Nova compostelá o venres 10 a partir das 18,00 h.
Estreitar lazos co teatro portugués
Nos últimos anos o CDG ten colaborado con estruturas públicas e compañías portuguesas dentro do seu obxectivo de servir de ponte entre profesionais das dúas beiras do Miño. En novembro de 2023 produciu xunto co Teatro do Noroeste-Centro Dramático de Viana, o Teatro Nacional Dona Maria II de Lisboa e o Teatro Nacional São João de Porto Manuela Rey Is In Da House.
En 2024 viron a luz as coproducións Territórios de liberdade, coa compañía galega Tanxarina Títeres e a portuguesa Varazim Teatro e Entrepalav-bras, da galega ButacaZero en alianza coa lusa TEatroensaio.
Ademais, dentro deste mesmo ciclo Quintas do Camões representouse a peza Salgueiro Maia: cartografía de um monólogo, de Teatro do Noroeste – Centro Dramático de Viana.
Dentro desta cooperación enmárcanse tamén os traballos desenvolvidos ao abeiro do proxecto europeo Nós/Nous, que impulsa a promoción profesional e a internacionalización do alumnado de arte dramática ao final da súa carreira académica e que posibilitou a finais do ano pasado as montaxes de Na hora dos cans e Ifixenia.
