Bisbarra, 12 de marzo do 2024 – O sindicato Comisións Obreiras convoca hoxe concentracións para denunciar que o Convenio Colectivo de Centros e Servizos de Atención a Persoas con Discapacidade leva tres anos sen avances.
Este convenio para centros de atención á discapacidade sería o número dezaseis pero CCOO denuncia que as organizacións patronais presentes na Mesa Negociadora están bloqueando a negociación, en especial desde que hai un ano a Audiencia Nacional recoñeceu aos traballadores o dereito á revisión salarial acordada para o 2022 e tivo que aplicarse.
Despois de máis dun ano de negociacións desde a sentenza, segundo o sindicato “a patronal volve bloquear a negociación do resto de condicións laborais coa mesma actitude e intransixencia de entón”. Lembran que se trata dun sector de marcado carácter social, no que as persoas traballadoras, formadas e cualificadas, representan o maior valor que teñen as entidades, as que permiten visibilizar o sector da discapacidade na sociedade e sobre as que pivota o principal apoio con que contan as persoas usuarias.
Comisión Obreiras denuncia que as condicións laborais actuais “non se axustan nin ao compromiso, nin á calidade, nin ao recoñecemento do esforzo que realizan as persoas traballadoras nos seus centros”.
Poñen como exemplos a elevada rotación de persoal nas empresas e entidades do sector, xunto coa falta de profesionais en determinados postos de traballo, por mor dos baixos salarios e a precariedade do resto de condicións.
