clinico larga
Compostela, 24 de xaneiro do 2024 – Comisións Obreiras denuncia que o mal estado dos equipos de radioloxía do Hospital Clínico de Santiago (CHUS) provocou un novo accidente laboral.
Trátase dunha lesión muscular derivada do manexo de equipos obsoletos. Ao mesmo tempo o sindicato engade que durante “toda a semana pasada estivo pechada a sala de filtro de urxencias” por unha avaría técnica.
O peche obrigou a suspender as citas programadas para poder atender as urxencias e o traslado de doentes a salas de radioloxía doutras plantas. A sala xa está operativa, se ben hai outra “que moito tememos que non tarde en estar fóra de servizo” segundo lamenta CCOO.
Renovación que non chega
Desde a sección sindical de CCOO sinalan que hai case un ano, en marzo do 2023, os responsables da Xerencia da Área Sanitaria comprometéronse a renovar as máquinas, pero a día de hoxe “nada se sabe ao respecto”.
O sindicato insta a acometer canto antes esa renovación, xa que esta situación ten repercusións tanto na saúde laboral do persoal sanitario, con constantes lesións musculares polo mal estado dos aparellos, como no desbordamento das Urxencias e os tempos de espera que deben padecer os doentes.
