Padrón, 13/03/2026 – O vindeiro 27 de marzo comezan as festas de Pascua de Padrón cun cartel deseñado, por primeira vez, por unha muller: Ángela Ríos.
Avogada de Extramundi de 24 anos, Ángela Ríos Martínez decidiu dar protagonismo aos cabaliños de Padrón, o tradicional carrusel que forma parte dos recordos da infancia de toda a comarca. A autora asegura que esta imaxe “é unha forma de volver á memoria colectiva e tamén á miña propia infancia, véndome reflectida eu mesma no cadro”.
Con esta obra, na que traballou durante quince días, Ángela Ríos quere, tamén, “renderlle unha homenaxe á familia Hernaiz”. A elección desta moza de Extramundi, graduada en Dereito e que cursou un máster en Sevilla para dedicarse profesionalmente á pintura ten como obxectivo apostar polo talento local e por darlle unha oportunidade ás figuras emerxentes da comarca.
O alcalde de Padrón, Anxo Arca, acompañado pola concelleira de Turismo e Festexos, Chus Campos, presentaron o cartel das festas e un amplo programa. O concerto de 9Louro será un dos atractivos da programación. Este mozo muradán de 22 anos é un dos referentes da música urbana galega e actuará o na praza de Macías o domingo de Pascua (22.00 horas), nunha velada que rematará co espectáculo de DJ Matrek Show no paseo do Espolón, á unha da madrugada.
Nueva Línea, a orquestra canaria que xa escoitaron 40 millóns de persoas nas redes sociais, estará en Padrón o venres de Pascuilla (22.30) e o grupo Assia, o domingo de Pascuilla (23.00 horas).
Como vén sendo tradición, as festas da Pascua xuntarán en Padrón as principais orquestras galegas (Panorama, París de Noia, Olympus, Los Satélites ou La Fórmula) e tamén as agrupacións locais (Unión y Fuerza, Charleston, Dúo Máster e Grupo Atenas).
A música tradicional, coas actuacións dos grupos folclóricos locais, e a das bandas teñen cabida nun cartel que non se esquece da xuventude, coas actuacións dos DJ que programa Open Air.
A Feira Cabalar do domingo de Pascua e a de maquinaria agrícola serán outros dos atractivos para visitar Padrón esta Semana Santa.
As festas rematarán o domingo de Pascuilla coa tradicional xuntanza da Irmandade dos Fillos e Amigos de Padrón, co Festival de Bandas Capital do Sar e cunha cita deportiva de primeiro nivel, a Clásica de Pascua, que este ano acada categoría internacional.
A proba ciclista trasládase ao Campus Tecnolóxico Cortizo, onde estará situada a saída e a liña de meta, dende o que máis de 150 corredores dos principais equipos farán un percorrido similar ao da Vuelta a España.
