Que un político, ou varios, gasten cartos en comidas e “refrixerios” non sorprende a ninguén. Si sumamos a tendencia que temos en Galicia de falalo todo arredor dunha comida o sucedido parece ata normal.
Na conversa que tiñamos con Francisco Pérez, o actual alcalde socialista de Noia, explicaba que non sabía quen filtrara as facturas do PP pero que en calquera caso era unha realidade.
Agora alguén, o mellor o mesmo, filtrou as do Psoe e a Marea Cidadá e Santiago Freire non tardou en dar unha rolda de prensa para explicar que facían o mesmo que eles,
O ex alcalde explica que as facturas pagáronse con “cargo ao grupo político” pero o que cobra o grupo político, todos, sae tamén do peto público. Esta afirmación lévanos á seguinte pregunta, non debería de poñerse un límite ao que se pode e non se pode facer con eses cartos?
A explicación de que durante os últimos anos tódolos grupos usaron os cartos que se lles asignou non responde moi ben a nosa pregunta. O certo é que este tipo de cuestións son as que fan que a veciñanza se afaste cada vez máis da política. Santiago Freire pensa sen embargo que hai algo de hipocrisía en todo esto.
Escoitando a Santiago Freire, e aos políticos en xeral, só cabe preguntarse se non se poden facer as reunións e os encontros coa veciñanza en horarios que non coincidan con comidas ou cenas, polo que se ve é complicado.
Un se pregunta si en outros países europeos terán asignacións, e si as teñen si as gastarán en comidas e pinchos; ben é certo que coa comida que teñen en algúns de eses sitios non é como para animarse.
Nunha cousa si ten razón Santiago Freire, todos somos un pouco hipócritas con estes temas porque quen non se queixou algunha vez, ao ir a calquera evento, de que nin pinchos puxeron?.
