Imaxe de arquivo
Compostela, 30/07/2026 – A Real Filharmonía de Galicia abre o período de inscrición de CANTAMOS!, o seu proxecto participativo dirixido a coros infantís e xuvenís de toda Galicia.
“CANTAMOS!” é unha iniciativa que reafirma o compromiso da orquestra por abrir o escenario á cidadanía e converter a práctica musical nun espazo compartido de encontro, aprendizaxe e creación colectiva.
As formacións interesadas poderán presentar a súa solicitude ata o 10 de setembro a través do formulario dispoñible na páxina web da Real Filharmonía de Galicia. Toda a información sobre o proxecto, o calendario e as condicións de participación pode consultarse en CANTAMOS!, mentres que a inscrición poderá formalizarse directamente a través do formulario en liña.
Ao longo de varios meses, os coros seleccionados prepararán un programa que culminará con dous concertos participativos os días 17 e 18 de decembro de 2026 no Auditorio de Galicia, nos que compartirán escenario coa Real Filharmonía de Galicia nunha experiencia artística e formativa única.
Nesta edición, CANTAMOS! propón unha viaxe musical que transita entre a forza evocadora do cinema de Nadal e a emoción das panxoliñas tradicionais galegas. O repertorio reúne algunhas das bandas sonoras máis recoñecibles do gran público, con música de Danny Elfman, John Williams e Alan Silvestri, xunto a arranxos realizados polo compositor británico Peter Hope sobre melodías tradicionais como Paxariños que voades, Vinde galeguiños ou Canción de berce para unha princesa negra. Un programa pensado para conectar diferentes xeracións a través dunha música que forma parte do imaxinario colectivo.
O proxecto estará dirixido por Javier Fajardo, quen obtivo recoñecementos en certames europeos de dirección coral e converteuse nun referente na creación de proxectos participativos que unen excelencia artística e vocación pedagóxica. Tras liderar as anteriores edicións de CANTAMOS!, volverá situarse á fronte desta iniciativa, na que centos de mozos e mozas xa tiveron a oportunidade de vivir a experiencia de cantar xunto a unha orquestra profesional.
Máis alá dos concertos, CANTAMOS! representa unha das principais apostas da Real Filharmonía de Galicia pola participación cidadá. A través deste proxecto, a orquestra reforza o seu papel como institución cultural aberta, creando pontes entre os intérpretes profesionais e o tecido coral galego, favorecendo o intercambio de experiencias e achegando a música sinfónica a novos públicos desde a práctica compartida.
A iniciativa desenvólvese en colaboración coa Asociación de Amigos da Ópera de Santiago e a Federación de Coros de Galicia, dúas entidades de referencia que contribúen ao impulso da actividade coral e á difusión da música en Galicia, consolidando unha alianza que fortalece o carácter participativo e integrador do proxecto.
Os ensaios celebraranse entre novembro e decembro no Auditorio de Galicia e culminarán cos dous concertos previstos para os días 17 e 18 de decembro. No caso de que o número de solicitudes supere a capacidade do escenario, realizarase unha selección que garanta o equilibrio das distintas cordas e a representatividade do conxunto das formacións participantes.
A relación de coros seleccionados publicarase posteriormente na páxina web e nas redes sociais da Real Filharmonía de Galicia.
