Compostela, 06/07/2026 – O Festival Atlántica de Narración Oral concede o seu premio Cornamusa a Camino Noia, nada en Compostela e profesora emérita da Universidade de Vigo.
Atlántica considera a Camino Noia como unha das grandes figuras da cultura galega contemporánea, pioneira na normalización académica da lingua galega, desenvolveu unha intensa traxectoria como investigadora, crítica literaria e estudosa da tradición oral.
Camino formou parte da xeración que impulsou a renovación cultural do país e participou, xunto con outros mozos galeguistas, nos primeiros pasos do proxecto que daría lugar á editorial Xeráis.
Ao longo da súa carreira, dedicou unha atención especial aos contos transmitidos de boca en boca, converténdose nunha das principais especialistas na narrativa oral galega. Atlántica lembra que obras como “Contos galegos de tradición oral” ou o monumental “Catálogo tipolóxico do conto galego de tradición oral” son hoxe referencias imprescindibles para coñecer a riqueza do noso patrimonio inmaterial.
Co rigor da investigadora e a curiosidade de quen sabe escoitar, Camiño Noia puxo en diálogo os relatos galegos cos doutras culturas e demostrou que as historias que nacen arredor dunha lareira forman parte dun inmenso mapa compartido pola humanidade.
Grazas ao seu traballo, moitos contos que parecían destinados ao esquecemento atoparon memoria e acubillo. Os seus libros permitiron preservar voces, personaxes e imaxinarios que seguen vivos e continúan viaxando de boca en boca, buscando sempre novas formas de ser contados.
Por esa dedicación exemplar á lingua, á literatura e á tradición oral, o Festival Atlántica entrégalle a súa Cornamusa de Honra, como recoñecemento a unha vida consagrada á salvagarda dun patrimonio que nos nomea e nos explica. Porque nas historias que herdamos e compartimos habita tamén a memoria do país e unha parte esencial da nosa identidade.
