Compostela, 6 de abril do 2021 – A violonchelista franco belga Camille Thomas actuará coa Real Filharmonía de Galicia no concerto semanal da orquestra.
A Real Filharmonía estreará ademais dúas pezas do pianista Fazil Say. O artistas cancelou a súa participación neste concerto, tal como estaba previsto na programación da tempada da RFG, debido ás dificultades que nestes momentos presentan as viaxes internacionais.
A cita será coma sempre o xoves ás oito da tarde. As entradas xa poden adquirirse na web www.compostelacultura.gal. Ademais, poderá seguirse en directo por streaming a través da canle de Youtube da RFG.
Fazil Say
Baixo o título “Nunca che rendas”, a orquestra estreará en España dúas obras do pianista e compositor turco Fazil Say (1970): Ana Tanriça (Nai Deusa) e Never Give Up (Nunca te rendas). Esta última será interpretada ao violoncelo por Camille Thomas. Trátase dunha resposta aos ataques terroristas de 2015 en París e Istambul, unha obra escrita expresamente para ela, que ofreceu a súa estrea mundial en 2018 na cidade parisiense. Segundo o autor, é “un clamor pola liberdade e a paz”.
O programa inclúe ademais varias Danzas eslavas de Antonín Dvoràk (1841-1904), en particular as número 2, 3 e 7. Son unha serie de 16 pezas moi animadas, inspiradas nas Danzas húngaras de Brahms.
Camille Thomas
A moza violonchelista franco-belga Camille Thomas empezou a tocar o violoncelo aos catro anos e progresou tan rapidamente que pronto iniciou os seus estudos co aclamado mestre Marcel Bardon. Continuou a súa formación en Berlín e Weimar. As súas primeiras actuacións foron en salas tan prestixiosas como a Sala Gaveau e o Teatro dos Campos Elíseos de París, o Vitoria Hall de Xenebra ou o Centro de Música de Xerusalén.
O seu avance internacional produciuse en 2014 cando foi nomeada para o premio “Revelación do Ano” na 21ª edición das Victoires da Musique Classique, o equivalente francés dos premios Grammy. Uns meses despois gañou o concurso de Novos Talentos impulsado pola Unión Europea de Radiodifusión. En 2016 triunfou na categoría de “Mozo Solista do Ano” nos premios C’ est du Belge da Radiotelevisión Belga, elixidos en colaboración coa revista Paris Match, e en 2018 foi seleccionada para a prestixiosa lista “30 under 30” de Forbes.
