Bisbarra, 22 de decembro do 2022 – O concello de Brión celebrou o pleno ordinario do mes de decembro no que todos os puntos foron aprobados por unanimidade.
O último pleno do ano non só recibiu o apoio de todos os grupos en todos os puntos se non que ademais non tivo intervencións. En primeiro lugar aprobouse un recoñecemento extraxudicial de crédito de 8.922,44 euros para o pago de facturas por servizos prestados no 2021 pero que foron presentadas neste 2022.
De xeito definitivo aprobouse a permuta dunha superficie de 421 metros cadrados dun camiño público na Chamiseira (A Pedreira) por outra zona para evitar así que o camiño atravesara unha finca particular; e declaráronse como efectos non utilizables dous camións e un tractor rozadora da brigada municipal de obras que, tanto pola súa antigüidade como polo seu estado, non eran utilizados dende hai tempo. Hoxe aprobouse a súa venda.
Finalmente, o pleno aprobou as altas e baixas no inventario municipal e tomou conta do período medio de pago do terceiro trimestre de 2022, que foi de 22,66 días. Unha cifra que confirma o anunciado polo secretario municipal no pleno do pasado mes de outubro: que os 55,06 días rexistrados no PMP do segundo trimestre do ano se xustificaban pola contabilización do pago dunhas obras moi importantes como as do Camiño de Amañecida á Graña. De feito, hoxe confirmouse que, unha vez contabilizado este investimento, o PMP do terceiro trimestre de 2022x baixara máis da metade con respecto ao seu predecesor.
