Bisbarra, 1 de abril do 2024 – O concello de Brión continúa cos traballos de recuperación da carballeira de Santa Minia e tras a retiradas das árbores enfermas comezou coa repoboación.
O espazo acolleu a chegada de oito exemplares de carballo procedentes dun viveiro de Abadín que ocupan xa zona sur da carballeira de Santa Minia. Durante a semana pasada procedeuse a reposición con terra nova para poder realizar a plantación dos oito novos carballos.
O alcalde de Brión, Pablo Lago, quen está seguindo puntualmente os traballos de repoboación explica que “de acordo coas recomendacións dos técnicos escollemos oito exemplares de pouco máis de tres metros de altura e que están perfectamente equilibrados entre copa e raíz, xa que así se facilitará o seu crecemento”.
As novas árbores de Santa Minia recibiron un tratamento fúngico preventivo, que foi reforzado durante a súa plantación. “Ademais, dispuxéronse dun xeito que poidan medrar e facer copas amplas de forma rápida ao non ter outros exemplares disputando o mesmo espazo”, comenta o alcalde brionés.
Unha vez plantados os novos exemplares, os técnicos comprobarán a súa correcta adaptación á carballeira brionesa. Será entón cando se proceda a analizar o resto de árbores da carballeira para coñecer o seu estado fitosanitario e determinar os seguintes pasos a seguir.
O sumidoiro que atravesa a carballeira de Santa Minia, que puido ser no seu día un problema para este enclave natural, neste momentos permite que as distintas áreas da carballeira poidan ser traballadas individualmente.
Os traballos de repoboación parcial da Carballeira de Santa Minia están sendo realizados por técnicos especialistas e foron autorizados o pasado mes de febreiro pola Dirección Xeral de Patrimonio Cultural da Xunta de Galicia.
