A choiva non desanimou a milleiros de persoas que acudiron a Santa Minia cunha afluencia moito maior que en pasadas edicións.
Brión viviu na fin de semana unha das principais romarías da bisbarra, a Santa Minia. Un evento que tivo o seu día principal o sábado con milleiros de persoas chegadas da comarca e de toda Galicia, algo do que daba fe o bo número de autobuses de excursións aparcados na contorna.
A chuvia non foi un obstáculo e os romeiros cumpriron coas tradicións de acudir a capela antes de pasar pola festa e polas polbeiras. O tempo medio de agarda para entrar no Santuario de Santa Minia chegaron a ser de máis de media hora o que da idea da gran afluencia de público.
As cinco polbeiras estiveron cheas desde a súa instalación e non deixaron de vender racións de polbo e de churrasco, a un prezo de 14 euros. O Día de Santa Minia a espera media para entrar nelas disparouse como non se lembraba nos últimos dez anos, chegando as colas ata a capela, por unha banda, e ata mediada a Carballeira, pola outra.
Pola súa banda, as atraccións infantís ateigaron a finca fronte ao centro social polivalente, onde manteñen un horario inclusivo de 16:00 a 17:00 horas no que funcionarán sen son para facilitar a participación de persoas con diversidade funcional.
Entre esta parcela e o santuario de Santa Minia apostáronse varios food-tracks e preto de 150 postos de venda de rosquillas, roupa, chourizos, antigüidades, queixos, xamón ibérico, larpeiradas, licores, filloas, ferramentas, pulseiras, velas, imaxes relixiosas, música, zapatos, xeados… e paraugas, sen dúbida o produto estrela este ano.
A música nas rúas brionesas correu a cargo do grupo de gaitas “Devagarinho” e a charanga Os Celtas, mentres a compañía galega Títeres Alakrán fixo unha ruada co espectáculo “O xigante Barriga Verde”, dentro do VIII Festival Monecadas. A sesión vermú correu a cargo da artista local Ruth Cundíns, no espazo reservado para as actuacións musicais, a carón das pulperías.
Autoridades
O alcalde de Brión, Pablo Lago, agradeceu o “extraordinario traballo que están a realizar os traballadores municipais, así como os membros de Protección Civil, Policía Local, Garda Civil, tanto de Brión como chegados doutras localidades, así como do persoal médico para que as festas se desenvolvan dentro da normalidade e sen ningunha incidencia”.
Lago Sanmartín guiou pola Romaría á comitiva oficial encabezada por Pedro Blanco, delegado do Goberno en Galicia; Valentín González Formoso, presidente da Deputación da Coruña; e José Manuel Merelles, director da Axencia de Turismo de Galicia; a quen acompañaron tamén Julio Abalde, subdelegado do Goberno na Coruña; os deputados provinciais Antonio Leira e María del Mar García Vidal; así como alcaldes, concelleiros e concelleiras da comarca. Tras un paseo pola contorna, a comitiva participou nun xantar nunha das polbeiras.
