Brión reclama melloras no servizos de autobús

Brión, 27/04/2026 – As melloras no funcionamento do transporte metropolitano é unha reclamación recorrente en toda a bisbarra. Autobuses escasos, horarios incumpridos o suspensión de frecuencias son algunhas das protestas da veciñanza en tódolos concellos.

Brión non é unha excepción e o BNG ven de recoller 250 sinaturas para reclamar melloras nos servizos de autobús. A intención é trasladar á Xunta de Galicia as queixas da veciñanza e esixir un transporte público digno.

A iniciativa encádrase nunha campaña comarcal que denuncia os problemas que afectan ao transporte público por estrada, como a supresión de liñas e frecuencias, cambios constantes de horarios que non se adaptan ás necesidades reais da veciñanza (especialmente no caso do estudantado), así como a falta de información clara sobre os servizos dispoñíbeis.

O BNG de Brión alerta ademais do estado dos vehículos, que considera en moitos casos antigos e pouco accesíbeis. Critica tamén a escasa atención ás reclamacións das persoas usuarias, que non reciben resposta por parte da Administración.

Neste sentido, a formación nacionalista reclama á Xunta a posta en marcha de liñas de autobús suficientes e estábeis, horarios útiles para a vida diaria e un servizo moderno, accesíbel e de calidade, que garanta o dereito á mobilidade no rural.

O BNG lamenta tamén o “desleixo” do Concello de Brión, en particular do seu alcalde e membro da Comisión de Seguimento do Plan de Transporte Metropolitano da Área de Santiago de Compostela. A formación nacionalista sinala que na última xuntanza do dito órgano non se manifestaron problemas no servizo. Ademais, preguntado o rexedor no pleno polas queixas das persoas usuarias, afirmou que “non lle constan”.

O BNG agarda que, co volume de sinaturas recollidas, “agora si teña constancia e cumpra coas súas obrigas, entre elas reivindicar o axeitado funcionamento dun servizo público esencial”.