Bisbarra, 15 de decembro do 2022 – O pasado venres o concello de Brión daba comezo ao Nadal co tradicional acendido das luces e este semana o teatro marca os primeiros eventos da programación.
Serán tres espectáculos que terán lugar no centro social polivalente e que son de entrada libre e de balde. Hoxe xoves a cita é con “Ornithology”, teatro para público adulto a medio camiño entre a narración tradicional, a épica escénica e o cabaré literario. Protagonizada por Quico Cadaval e Pablo Castaño, a función comezará ás 20:00 horas.
Mañá venres 16 de decembro, será a quenda de Ste Xeito Producións, que porá sobre o escenario brionés “Feminíssimas”, unha comedia negra escrita por Esther F. Carrodeguas, que a interpreta canda Noelia Blanco Pérez e Stephy Llaryora. Tres actrices que representan tres formas distintas de entender o feminismo: o radical, o liberal e o postfeminismo. Neste caso, a actuación terá lugar ás 21:00 horas.
Finalmente, a sesión do sábado 17 de decembro irá dirixida a un público familiar, con nenos e nenas de máis de 7 anos. Ás 20:00 horas, Farándula Velutina escenificará “A derradeira Bala”, unha comedia que chega a Brión da man da Federación Galega de Teatro Afeccionado e que quedara adiada no seu día por mor da covi. Neste caso é unha comedia ambientada nun contexto de guerra.
A maiores, este venres 16 de decembro, ás 18:00 horas, a sala municipal de exposicións acollerá “O apalpador conta con vós”, un espectáculo de Caxoto dirixido a nenos e nenas de entre 4 e 10 anos. A entrada será libre e de balde ata completar aforo, se ben é posible reservar localidades a través da web municipal www.concellodebrion.gal.
Concerto e monicreques
Ademais dos concursos de tarxetas e decoración de Nadal e das actividades de conciliación do 23 de decembro ao 5 de xaneiro, o venres 23 de decembro terá lugar un Concerto de Nadal. Loli e os reis do ritmo porán en escena “Un Nadal con ritmo”, un espectáculo para toda a familia no polivalente a partir das 18:00 horas.
O ano 2023 chegará, como é habitual en Brión, da man do Festival de Titeres, que cumpre a súa edición número 27. Tres actuacións que terán lugar no polivalente, ás 17:30 horas. Trátase de Mircromina Teatro con “Raio de Loubican” (luns 2), Marionetas Rui Sousa con “Marionetas musicais” (martes 3) e Larei Lará co “Dinosauros. O regreso dos saurios” (mércores4).
A guinda final queda para o xoves 5 coa Cabalgata de Reis que, como en anos anteriores, fará un percorrido polas parroquias durante toda a xornada.