Bisbarra, 10 de abril do 2023 – O lucense Vicente Piñeiro faise co Premio Laudamuco para textos teatrais que organiza cada ano o concello de Brión.
O Premio Laudamuco conta ademais coa participación da Academia Galega de Teatro e Edicións Positivas. En esta quinta edición o gañador presentou a peza “Devólvenos a Xermánico”, pola que recibirá un premio de 7.000 euros e a edición do texto.
O xurado estivo composto por Francisca Abeledo Seren, Fabrice Corrons, Xosé Manuel Rabón, Francisco Oti Ríos e Eduardo Rodríguez Cunha, quen actuou como secretario. Eles acordaron por maioría premiar a proposta de Vicente Piñeiro “pola súa perfección e estrutura dramatúrxica, pola temática histórica con excelencia documental o que dá como resultado unha obra teatral perfecta”.
Vicente Piñeiro, de profesión topógrafo xubilado da Enxeñería Civil e Minas e escritor de afección, é un recoñecido autor en Galicia de novela e teatro. As súas obras baséanse en acontecementos e personaxes históricos de diferentes épocas, aínda que sente especial predilección polo pasado romano. Tamén conta con varios volumes de poesía, contos e ensaio. En 2003 xa gañara o Concurso de Poesía das Letras de Vilalba, pola obra “Señor, as túas pupilas son moi azuis”.
O acto de entrega do galardón está previsto para o martes 16 de maio en Brión, momento no que Vicente Piñeiro sucederá no palmarés do Premio Laudamuco a Paula Carballeira Cabana, Francisco Antonio Vidal Blanco, Raúl Dans e Xavier Lama López, gañadores das edicións anteriores. Nas súas catro primeiras edicións, o galardón recaeu no lucense Xavier Lama López por “Na miña alma ouvea un lobo” (2019), no coruñés Raúl Dans Mayor por “Só un home bo” (2020) e no ribeirense Francisco Antonio Vidal Blanco por “A vinganza de Fortimbrás” (2021) e na teense Paula Carballeira Cabana por “Dentes de coello” (2023).
