Bisbarra, 30 de marzo do 2023 – O Pleno Municipal de Brión aprobou os Orzamentos Municipais para 2023, e que ascenden a 7.270.728,30 euros, un 2,62% máis ca en 2022.
A voceira municipal destacou que os orzamentos de Brión “aumentan o gasto social e incrementan a inversión en educación, mobilidade, seguridade e deporte, sen aumentar impostos nin endebedarse”. As contas saíron adiante co voto a favor do PSOE e o PP, e a abstención do BNG.
Sandy Cebral agradeceu o traballo dos concelleiros do grupo de Goberno e do persoal municipal na elaboración “duns orzamentos realistas, viables e que darán solución ás necesidades dos veciños e ás peticións que nos fixeron chegar, algunhas como poden ver achegadas tamén polos grupos da oposición”.
A voceira destacou a recuperación de partidas como as dedicadas a financiar unha liña municipal semanal de transporte ata o centro de saúde ou a creación dunha nova partida para a convocatoria de axudas de apoio ao ensino.
Máis de 600.000 € de inversión de recursos propios
Nas contas os gastos de persoal medran un 6,06% con respecto ao exercicio 2022, chegando aos 2,81 millóns de euros. A partida destinada a gasto corrente en bens e servizos ascende a 2.987.619,31 euros, o 41,09% do orzamento total, para o mantemento dos servizos básicos. Tamén se recollen 25.411,66 euros para o obradoiro dual de emprego 2022-2023 Renova V para a instalación fotovoltaica de Lens, titularidade de Ames e Brión.
O Capítulo VI de Investimentos Reais suma 791.891,92 euros, dos que o Concello de Brión achega 622.411,68 euros de fondos propios, un 1,98% máis ca en 2021. Neste capítulo contémplanse os 169.480,25 euros dos POS+2023, que se destinarán a un proxecto de mellora da estrada que une a rúa Gondar co límite do municipio.
Tamén se inclúen 247.972,81 euros do proxecto de mellora da eficiencia enerxética do alumeado público, “que consideramos prioritario e urxente para conter os gastos de consumo eléctrico”, apunta Sandy Cebral.
Debate
O voceiro do BNG, Xosé Luís Penas, xustificou a abstención do seu grupo novamente en que “os orzamentos se volven presentar fóra de prazo e non se contou cos grupos políticos para a súa elaboración”. Aínda que recoñeceu a alta execución que alcanza o Concello de Brión nos seus orzamentos (superior ao 80’% en 2021).
Un punto ao que Sandy Cebral respondeu que este orzamento é “realista e adaptado ás necesidades dos veciños, a quen busca solucionar problemas e proporcionarlles os mellores servizos, non venderlles discursos políticos”.
Pola súa banda, a voceira do PP, María Fariña, votou a favor das contas, agradecendo que incluíran algunhas das peticións realizadas polo seu grupo municipal no Pleno.
Remanente
O alcalde de Brión, Pablo Lago Sanmartín, agradeceu “o ton construtivo do debate, o que tamén quere dicir que tanto non lles desgustaron estes orzamentos”. Así mesmo, pechou a sesión adiantando as inversións que o Concello de Brión vai acometer no 2023 con cargo ao remanente de Tesourería.
As achegas máis importantes irán destinadas á mellora do saneamento de Gundín, Gándara, Sabaxáns, Brans de Abaixo, Outeiro, Sanín e Guitiande, así como das rúas Santiago e Lameiras. “É unha aposta importante para cubrir unha das necesidades básicas dos veciños como é o saneamento, aínda que non sexan unha obras que se vaian ver”, apunta Pablo Lago.
Outros investimentos significativos son a construción dunha pista deportiva nos Ánxeles e o polideportivo municipal, o arranxo dos parques infantís de Sabaxáns, Vioxo e Bastavales, así como a creación dun novo en Nináns (Luaña). Tamén se instalarán paneis solares nos edificios municipais e se instalarán puntos de recarga de vehículos eléctricos, ademais de arranxar o teito da gardería municipal.
Así mesmo, o Remanente financiará importantes investimentos en pavimentado de núcleos de poboación (empezando por Tourís, Coruxido, Sabaxáns…) e a instalación dun novo alumeado público na carballeira de Santa Minia e no Paseo do Río Pego. Tamén se habilitará unha área para caravanas e se construirá un área especial para que os cans poidan correr soltos a carón do actual parque canino, que seguirá co seu circuíto de Agility).
Pablo Lago destacou que “este Remanente se vai gastar en proxectos para que os veciños e veciñas de Brión teñan os mellores servizos, non para vender nunhas eleccións. Se quixera facelo para gañar as eleccións, tería sacado a licitación os 605.000 euros do proxecto de mellora da AC-543 que asinamos coa Xunta de Galicia e que estaría rematado para antes das eleccións. Pero como estamos falando da primeira zona na que se instalou o saneamento en Brión, temos que solucionarlle a problemática aos veciños, que contan cunha rede moi antiga e en formigón. Isto suporá un investimento previo de 300.000 euros para mellorar o saneamento na zona”.
