Imaxe de arquivo dun pleno en Brión
Brión celebrou o pleno ordinario de febreiro no que a unanimidade foi a nota dominante da sesión. Mesmo coas mocións presentadas pola oposición que tamén saíron adiante sen máis atrancos.
Un dos principais puntos aprobados foi o convenio co concello de Ames para desenvolver p o Plan Integrado de Emprego. O Plan conta cunha achega da Xunta de Galicia de 220.000 € para un total de 257.000 € que Ames e Brión completarán con fondos propios.
O Plan Integrado de Emprego beneficiará a 100 persoas desempregadas de ambos os dous municipios.
O pleno aprobou tamén encomendar ao Concello de Ames dos proxectos cofinanciados para a prevención de condutas aditivas. Unha iniciativa presentada á Xunta de Galicia e que aínda está pendente de coñecerse se recibe ou non subvención.
Mocións
Na quenda de mocións, o Pleno aprobou un Recoñecemento Extraxudicial de Crédito de 2.008 euros para o pago de cotas na comisión de propietarios de Agronovo. Unha factura na que a asesoría da comunidade de propietarios cometeu un erro na súa emisión, polo que a factura correspondente ao 2025 chegou ao Concello en 2026.
Os tres grupos municipais acordaron aprobar como Declaración Institucional a moción do BNG para conseguir avanzar en igualdade real e efectiva fronte ao rearmamento do machismo.
Un texto moi similar aos aprobados en anos anteriores e no que se reafirma o compromiso do Concello de Brión coa loita feminista e o apoio ás mobilizacións e reivindicacións do feminismo galego organizado neste 8 de marzo de 2026.
Instase tamén á Xunta de Galicia á creación dun Instituto Galego das Mulleres e a impulsar un novo marco orzamentario e regulamentario para os Centros de Información á Muller.
Os tres grupos municipais aprobaron ademais unha moción de rexeitamento ás modificacións na Lei de Patrimonio de Galicia realizadas a través da Lei de Acompañamento dos Orzamentos de 2026 presentada polo BNG e emendada polo PSOE.
A moción do BNG insta á Xunta a retirar a modificación da Lei de Patrimonio recollida na Lei de Acompañamento dos Orzamentos, así como a dar traslado desta moción ás forzas políticas no Parlamento galego e facultar á Alcaldía a tomar as medidas precisas para garantir o cumprimento deste acordo.
Pola súa banda, os socialistas engadiron dous puntos máis: Reclamar a eliminación do silencio administrativo positivo nos procedementos que afecten a bens patrimoniais, asegurando a necesidade de informes técnicos expresos como instrumento básico de seguridade xurídica e operativa na toma de decisións; e no caso de non conseguir a retirada da modificación da Lei como pedía o BNG, solicitar que calquera delegación de funcións aos concellos en materia de patrimonio cultural vaia acompañada da correspondente dotación de recursos económicos, persoal técnico cualificado e mecanismos efectivos de coordinación interadministrativa que permitan o exercicio destas competencias con garantías.
