Bisbarra, de novembro do 2024 – Tres sesións de microteatro de Fauna 113, Teatro de Cámara DITEA e Porta Aberta Teatro, xunto á obra “Testosterona”, de Malasombra Produccións, abren esta fin de semana a programación cultural de Brión para este mes de novembro.
Un programa totalmente gratuíto que inclúe oito actividades para as noites dos venres e sábados deste mes de novembro e que está composto por seis actuacións teatrais no centro social polivalente, un magosto e unha nova edición da “Andaina do terror”.
Esta programación arrincou este venres coa obra “Testosterona”, de Malasombra Produccións, unha profunda reflexión sobre a desigualdade laboral por cuestión de sexo escrita pola autora mexicana Sabina Berman pero dende un punto de vista cómico.
Hoxe sábado 9 de novembro, ás 20:00 horas, derradeira sesión de Fegateatro 2024, un ciclo de teatro afeccionado organizado polo Concello de Brión e a Federación Galega de Teatro Afeccionado (FEGATEA). Para pechando a programación, sobre o escenario brionés estarán tres compañías poñendo en escena tres pezas de duración breve nunha sesión denominada “Microteatro”. Así, Fauna 113 porá en escena “SOS”, Teatro de Cámara Ditea presentará “As xoias de tía Ágata” e Porta Aberta Teatro pechará a sesión con “…e punto”.
Resto do mes
Para a próxima fin de semana están programadas outras dúas actuacións gratuítas no polivalente brionés: Talía Teatro, con “A parábola do Aganzo” (venres 15, ás 20:30 horas) e a actuación musical de Julia Vari e Carlos Arévalo co espectáculo “Boleros del alma” (sábado 16, ás 20:00 horas).
Finalmente, o ciclo de teatro profesional “Outono Cultural” de Brión completará o seu cartel de novembro con “Brokeback Sabucedo: paixón entre bestas”, de Sal do Teatro (venres 22, ás 20:30 horas) e “Cortello de amor”, de Amorodio Teatro (o domingo 30, ás 20:00 horas).
A programación cultural completarase co tradicional magosto, que terá lugar o venres 29 de novembro, ás 20:00 horas, e que este ano desprazarase da Carballeira de Santa Minia ata a praza contigua. Finalmente, o sábado 23 de novembro terá lugar a segunda edición da “Andaina do Terror”, organizada pola asociación O Esquío no Piñeiro en colaboración co Concello de Brión, na que non só están xa cubertas as 600 prazas dispoñibles, senón que se fixo unha ampliación de 150 persoas máis que estaban anotadas en lista de agarda.
