O Concello de Brión vén de iniciar a segunda fase das obras de humanización e mellora da seguridade viaria da estrada AC-543 ao seu paso polo núcleo de Os Ánxeles.
Uns traballos que deron comezo esta semana no Tremo coa reposición dun tramo do sistema de saneamento e abastecemento de auga, un dos primeiros en instalarse no municipio. Trátase do proxecto de “Acondicionamento da AC-543 ao seu paso polo Concello de Brión, entre os puntos quilométricos 8+390 e 9+870”.
O obra conta cun investimento de 1,24 millóns de euros, dos que a Xunta de Galicia achega 423.781 euros e o Concello de Brión os 815.000 euros restantes. A primeira fase, os 550 metros entre a rotonda coa AC-300 e a conexión coa estrada DP-1301 á altura das urbanizacións Agronovo e Inxerido, xa está executado na súa totalidade, o que supón o 40% da obra.
O alcalde de Brión, Pablo Lago, explica que “Agora comezamos co 60% restante, ata o límite con Ames, sobre unha lonxitude de 950 metros. Somos conscientes de que, como todas as obras, causarán certas molestias á veciñanza, pero volvemos apostar por non cortar o tráfico durante a súa execución para alterar o menos posible o día a día dunha das zonas máis poboadas de Brión”
Lago engade que está “totalmente convencido de que, ao igual que pasou na primeira fase, cando estean rematadas a veciñanza en xeral, e as persoas residentes na zona en particular, porán en valor esta humanización”. Uns traballos que están sendo executados pola empresa Alcomte Galicia.
As obras que comezan esta semana suporán a reposición da rede de saneamento cunha canalización de PVC de 315 milímetros de diámetro, pozos de rexistro e acometidas domiciliaria.
No que respecta á rede de abastecemento, executarase unha canalización de PVC de 125 milímetros de diámetro, con arquetas, valvulería e acometidas domiciliarias. Durante a execución destas obras procederase ao traslado dos puntos de luz, situados en moitos casos no medio das beirarrúas, e colocarase unha nova canalización do seu cableado.
Acto seguido, procederase á demolición e construción dunhas novas beirarrúas, dun ancho mínimo de 1.8 metros. “Unhas beirarrúas para que persoas con mobilidade reducida ou familias cun carriño de bebé poidan circular pola zona sen obstáculos”, puntualiza Lago Sanmartín.
Paralelamente, a Axencia Galega de Infraestruturas aproveitará as obras para colocar as novas marquesiñas de autobuses. Os traballos rematarán co aglomerado da estrada, instalación da correspondente sinalización vertical e horizontal, acondicionamento de zonas verdes con céspede, árbores e arbustos, así como a colocación de xardineiras, bancos e demais mobiliario urbano.
A maiores estreitaranse os carrís de circulación, o que facilitará tamén a redución da velocidade dos vehículos nunha zona que está identificada como un treito de concentración de accidentes, tanto por colisións entre vehículos como por atropelos.
Deste xeito, a intervención que vén de iniciarse ten como fin conseguir que a estrada AC-543 ao seu paso por Brión se converta nunha rúa, nunha vía máis humana ao servizo dos núcleos de poboación polos que pasa e con especial atención aos usuarios vulnerables.
Ao ser un dos tramos que concentra unha maior circulación de vehículos no municipio, o Concello pediulle á empresa concesionaria que tratara no posible de manter sempre a estrada AC-543 aberta, encargándose da xestión do paso alternativo de vehículos como aconteceu durante esta semana.
