A ANPA explica que case o 60% do alumnado presenta necesidades específicas de apoio educativo e que están dispostos a pecharse no centro ata conseguir os recursos necesarios.
A situación na educación comeza a parecerse á da sanidade. Cada certo tempo as familias denuncian carencias nun centro e falta de recursos. Si se suman as demandas o panorama comeza ser máis que preocupante.
As veces son carencias materiais con edificios e moi mal estado pola falta de mantemento e inversión. Noutras ocasións a saturación no centro provoca situacións indesexables. Ou, como é o caso de Brión, o que se denuncia é a falta de profesorado.
Promesas incumpridas
Desde a Asociación de Nais e Pais do Alumnado (ANPA) do IES de Brión denuncian a grave situación de falta de recursos que sofre o centro, especialmente preocupante ao constatar que o 59,44% do alumnado presenta Necesidades Específicas de Apoio Educativo (NEAE).
Esta cifra reflicte un nivel de atención moi elevado e excepcional, “que non está sendo correspondido cos recursos mínimos necesarios por parte da Consellería de Educación”. A pesar do esforzo do equipo docente, os actuais 2,5 especialistas a tempo parcial son insuficientes para garantir “unha atención digna, personalizada e eficaz”.
Hai agora un ano, lembra a ANPA, “ mantivemos unha reunión coa Consellería de Educación, concretamente co departamento de Recursos Humanos, na que se nos prometeron unha serie de reforzos e medios que finalmente non chegaron. Esta falta de cumprimento agrava a situación actual e mina a confianza das familias na palabra da administración”.
Ante a preocupante tendencia á alza destas necesidades no centro, e vendo que as medidas adoptadas polo propio instituto non poden compensar a ausencia de medios, “desde o AMPA vémonos na obriga de facer pública esta situación e de esixir unha resposta inmediata”.
As familias resumen as necesidades en falta de profesionais de Pedagoxía Terapéutica e Psicoloxía Educativa; ausencia dun equipo especializado en intervención en risco de suicidio; déficits en logopedia, orientación emocional, atención ás altas capacidades e reforzos en aula.
A ANPA no comunicado enviado aos medios solicita “a dotación de dúas prazas completas e estables de Pedagoxía Terapéutica (PT) durante todo o curso escolar; a recuperación inmediata da figura do reforzo educativo, cunha persoa a tempo completo e a ampliación do servizo de orientación, mediante a incorporación dun segundo profesional.
As familias tamén engaden que “estas medidas non son negociables: son imprescindibles para garantir o dereito á educación inclusiva e de calidade para todo o alumnado, sen importar a súa situación persoal ou educativa”.
Finalmente rematan dicindo que “queremos deixar claro que, se esta situación non se resolve de maneira inmediata, as familias estamos dispostas a tomar medidas contundentes, incluído encerrarnos no centro educativo, para defender os dereitos dos nosos fillos e fillas. Non imos permitir que se repitan as promesas baleiras nin que se sigan vulnerando os dereitos básicos do alumnado”.
