Bisbarra, 4 de abril do 2023 – O concello de Brión ven de conseguir o apoio económico da Deputación da Coruña para as obras de ampliación do pavillón polideportivo de Pedrouzos.
O alcalde, Pablo Lago, mantivo unha reunión co delegado de economía do organismo provincial, Antonio Leira, quen comprometeu 150.000 euros para os traballos no pavillón. O custo total do proxecto aprobado no pleno brionés ascende a 540.346,086 euros.
Pablo Lago agradeceu o compromiso da Deputación da Coruña “pois estamos falando dun proxecto moi necesario pois o actual polideportivo quedou pequeno e precisamos construír un segundo recinto que servirá tanto para a práctica deportiva como para acoller actividades culturais e educativas organizadas polo Concello, así como para o desenvolvemento de iniciativas do CEIP de Pedrouzos e o IES de Brión”.
O proxecto inclúe tamén a construción dunha pérgola de acceso á nova ampliación, que protexerá tamén da choiva ao alumnado de ambos centros escolares tanto cando teñen que agardar polos autobuses de volta a casa como nas chegadas aos colexios durante a mañá.
Agradecemento á Deputación
O alcalde de Brión agradeceulle ao deputado delegado de Economía, Facenda, Especial de Contas, Persoal e Réxime Interior a confirmación de que a Deputación da Coruña ten consignados 150.000 euros para este proxecto, de modo que o convenio de colaboración entre o Concello de Brión e a Deputación da Coruña poderá ser asinado “en canto presentemos a modificación de crédito con cargo ao Remanente de Tesourería que xa anunciamos cando aprobamos os orzamentos de 2023”.
De feito, o alcalde brionés puntualiza que “se non quixemos incluír este proxecto nos Orzamentos de 2023 era porque aínda non tiñamos confirmado que a achega da Deputación se podería facer efectiva este ano, polo que tomamos a decisión de deixalo fóra dos Orzamentos. Agora que a Deputación da Coruña confirma a concesión desta subvención nominativa en favor do Concello de Brión, só teremos que incluír o orzamento preciso nunha modificación de crédito e aprobala en Pleno”.
Proxecto de ampliación
O proxecto de ampliación do pavillón municipal de deportes de Pedrouzos inclúe a construción dun segundo recinto de 630 m2 a carón do actual polideportivo e que será utilizado tanto para a práctica deportiva como para a realización de actividades culturais e/ou educativas por parte do colexio, do instituto ou do propio Concello de Brión. O novo inmoble contará cunha capa impermeabilizante e con paneis absorbentes acústicos, polo que manterá unha boa temperatura e unhas condicións axeitadas para a práctica de calquera tipo de actividade cultural, social ou deportiva.
O proxecto inclúe tamén a construción dunha pérgola de acceso á nova ampliación, de 128,77 m2, que protexerá da choiva tanto ás persoas usuarias desta instalación como ao alumnado do CEIP e do IES que utilizan os autobuses escolares para achegarse ou marchar do centro durante a xornada de mañá. O alcalde lembra que “o proxecto está adaptado ás medidas máximas da parcela que temos e non imos levalo a outro lado porque queremos que esta nova instalación teña un carácter complementario para as familias de Brión”. Así, na mesma contorna estarán emprazadas a piscina municipal cuberta, a pista de pádel, o campo municipal de fútbol, o actual polideportivo municipal e a súa futura ampliación.
