Bisbarra, 25 de xaneiro do 2024 – O concello de Brión e a Deputación da Coruña asinaron un convenio para a ampliación e mellora do pavillón municipal de Pedrouzos.
O presidente da Deputación, Valentín González, e o alcalde de Brión, Pablo Lago, foron os encargados de rubricar o acordo. O ente provincial achegará 150.000 euros para as obras en Pedrouzos. No acto tamén estivo presente o deputado de Contratación Xosé Penas.
Este proxecto conta cun orzamento total de 540.346 euros, dos que a entidade provincial achega o 28 % da financiación. As obras consisten no mantemento do actual pavillón municipal, incluíndo un novo inmoble no seu lateral, cara o CEIP de Pedrouzos e o IES de Brión, que conta cunha superficie de 648 metros cadrados.
Será un espazo multiúsos que poderá ser empregado polo Concello de Brión como sede de competicións deportivas ou para acoller encontros culturais e sociais de calquera tipo, tales como concertos e exposicións. O novo inmoble servirá de apoio ao colexio e ao instituto, ao poder acoller actividades extraescolares ou calquera outra que precisen. Todo, nun edificio sen ningún tipo de barreiras arquitectónicas.
A nova instalación de Pedrouzos será unha mestura entre unha estrutura de formigón de elementos prefabricados e unha construción metálica anexa. O novo inmoble contará cunha capa impermeabilizante e con paneis absorbentes acústicos, polo que manterá unha boa temperatura e unhas condicións axeitadas para a práctica de calquera tipo de actividade cultural, social ou deportiva.
O proxecto inclúe tamén a construción dunha pérgola de acceso entre o actual polideportivo e a nova ampliación. Cunha superficie duns 130 m2, protexerá das inclemencias meteorolóxicas ás persoas usuarias desta instalación, tanto á hora do seu acceso como no tempo de agarda para a súa volta á casa. As obras contan cun prazo de execución de 12 meses.
