Asinarán un protocolo de colaboración no que a Xunta se compromete, entre outros traballos, á rehabilitación e ampliación do patio cuberto do CEIP de Pedrouzos en Brión.
Pleno ordinario de Abril en Brión tomou facultou ao alcalde, Pablo Lago Sanmartín, para asinar un protocolo de colaboración entre o Concello e a Consellería de Educación, Ciencia, Universidades e FP. Este acordo servirá para a mellora das infraestruturas educativas do municipio, que se plasmarán nun convenio que recolla as obrigas de cada unha das partes.
A Xunta de Galicia tramitará e executará o proxecto de rehabilitación e ampliación do patio cuberto do CEIP de Pedrouzos. Tamén procederá á desafección de 200 metros cadrados do colexio, que serán cedidos a Brión para a construción dunha dársena de autobuses que mellore o servizo de transporte do alumnado.
O Concello de Brión tramitará e executará a cubrición dos laterais do patio cuberto do IES de Brión, e construirá a parada de autobuses. O Concello aproveitará para reorganizar o tráfico en toda a zona para facilitar a circulación dos escolares e dos usuarios de instalacións como o polideportivo municipal e a piscina cuberta climatizada.
Finalmente, Concello e Xunta comprométense a asinar un acordo para facilitar o uso compartido do patio cuberto do IES de Brión, de forma que o Concello poida programar actividades nestas instalacións fóra do horario lectivo.
Regulamento de honras e distincións
Por outro lado, o Pleno aprobou por unanimidade o Regulamento de Títulos, Honras e Distincións do Concello, entre as que se inclúen figuras como: Medalla do Concello, Fillo/a Predilecto/a, Fillo/a Adoptivo/a, Cidadá distinguido/a, Medalla ao Mérito para Persoal Traballador, Cronista Oficial de Brión e Visitante Ilustre.
As propostas poderán realizarse tanto dende os grupos municipais como dende a sociedade civil, tendo que xustificar os méritos desa persoa e recibir o visto bo do Pleno Municipal.
Pablo Lago anunciou que “Xosé Vizoso será a primeira persoa en ser distinguida unha vez que estea aprobado este regulamento, pola súa vinculación especial con Brión”. Unha proposta que foi ben recibida tanto polo PP como polo BNG, cuxo voceiro, Xosé Penas, pediu que se engadira no regulamento a no admisión de propostas de persoas que atentaran contra a memoria histórica.
Por último, o Pleno aprobou o convenio marco polo que se establecen as bases de cooperación entre a Deputación da Coruña e os Concellos de Ames, Brión, Santiago de Compostela, Teo e Val do Dubra para regular o proxecto Parque Compostela Rupestre. Un ente no que Brión estará representado polo seu alcalde, Pablo Lago, e polo xestor cultural, Alberto Álvarez.
