Bisbarra, 21 de decembro do 2024 – O concello de Brión formalizou ante notario a compra de terreo para a construción de vivenda protexida e vivenda libre.
O alcalde de Brión, Pablo Lago Sanmartín, acudiu á notaria para formalizar a adquisición de estas fincas no lugar de Liñares. O acto foi definido polo rexedor como “un día histórico para Brión, pois será a primeira vez que se promova a construción de vivenda protexida neste municipio”..
Lago explica que “hoxe investimos 164.560 euros na compra de cinco fincas do SAREB en Liñares, taxadas cada unha en 500.000 euros. Trátase dunha operación beneficiosa para o Concello e para a veciñanza de Brión porque por primeira vez na historia deste Concello imos ter terreo para destinar á creación de vivenda protexida e, por outra, contaremos cun retorno económico cando se saquen a concurso as outras parcelas destinadas a vivenda libre”.
As parcelas están ao carón da entrada/saída da Autovía Santiago-Brión e ao pé do inicio da avenida de Santa Minia. O terreo suma un total de 4.295 metros cadrados de superficie no polígono único da área de reparto número 9 do Plan Xeral de Ordenación Municipal de Brión.
Vivenda a disposición da veciñanza
Estas catro fincas estaban taxadas en medio millón de euros cada unha, pero o Concello tivo a oportunidade de adquirirllas á Sociedad de Gestión de Activos Procedentes de Reestructuración Bancaria SA por 164.560 euros, “un prezo máis que razoable, polo que estou convencido de que esta operación vai ser beneficiosa en todos os sentidos, sobre todo no de axudar a poñer vivenda a disposición da cidadanía”, sinala o alcalde brionés.
Pablo Lago indica que “tendo en conta o problema de vivenda que temos a nivel nacional, entendemos que para o Concello de Brión é unha oportunidade única para crear vivenda protexida no noso municipio e dar unha resposta a unha necesidade que non tiñamos cuberta en Brión. Unha operación que culmina unha semana grande en Brión, pois tamén sacamos adiante dous proxectos por máis de 16 millóns de euros que permitirán mellorar o sistema de abastecemento de auga e dotar a todo o municipio dun alumeado máis eficiente”.
Os 164.560 euros investidos serán financiados con cargo ao Remanente Líquido de Tesourería do Concello, despois da aprobación do expediente de modificación de créditos 1/2024 de crédito extraordinario nunha sesión plenaria extraordinaria do pasado mes de novembro. Unha proposta da Alcaldía que foi aprobada cos seis votos a favor do grupo de Goberno e coas abstencións de PP e BNG.
