O alcalde de Brión e a vicepresidenta de FEGATEA asinaron o convenio de colaboración que permitirá a posta en escena de sete obras teatrais de acceso gratuíto para a veciñanza
O teatro amador é unha das citas do outono cultural de Brión. Coa intención de preparar todo oc tempo suficiente, o concello e a asociación FEGATEA veñen de asinar un convenio que concreta os termos nos que se desenvolverá en este 2025 o ciclo Fegateatro.
O alcalde de Brión, Pablo Lago, e a vicepresidenta da Federación Galega de Teatro Afeccionado (FEGATEA), Ana Mª Rodríguez, foron os responsables de asinar o acordo. Unha colaboración que permitirá a representación de sete actuacións de teatro amador de acceso gratuíto para a veciñanza.
Esta nova edición do Fegateatro desenvolverase os días 11, 18 e 25 de outubro, así como o 8, 15, 22 e 29 de novembro no auditorio do centro social polivalente. A programación será elaborada pola Federación Galega de Teatro Afeccionado, tendo en conta as demandas do público brionés e cunha oferta que na actualidade conta con pezas de 56 grupos de teatro, procedentes das catro provincias galegas, sumando máis de 700 integrantes.
Desde a súa fundación hai 25 anos, FEGATEA reforzou un espazo propio para o teatro afeccionado en Galicia, avalado polas numerosas actividades que organiza, así como as que apoia e nas que participa.
Este labor foi recoñecido a nivel estatal con diversos premios como o Táboas da Federación Valenciana de Teatro en 2012 ou o da Federación de Teatro Afeccionado de Castela e León en 2016. Ademais, en decembro de 2020, a Xunta de Galicia outorgoulle o Premio da Cultura Galega na categoría de Artes Escénicas.
