Bisbarra, 7 de setembro do 2023 – Brión acollerá o vindeiro 1 de outubro a 40º edición da Carreira Pedestre da Amaia, que ven de abrir o período de inscricións.
Organizada polo Concello de Brión, en colaboración co Club Deportivo Brión Hyupersa Santiago, a Carreira Pedestre da Amaia comezará as dez da mañá nas inmediacións do parque de Pedrouzos.
A carreira é unha proba oficial da Federación Galega de Atletismo e terá lugar baixo o control técnico do Comité Galego de Xuíces da Federación Galega de Atletismo. A maiores, será puntuable para o IX Circuíto de Carreiras da Deputación da Coruña.
As inscricións poderán formalizarse ata o mércores 27 de setembro a través da web www.carreirasgalegas.com. Como nas corenta edicións precedentes, as persoas adultas deberán aboar 5 euros, mentres que para os menores de 16 anos as inscricións son de balde.
Cambios sobre edicións anteriores
A XL Carreira Pedestre da Amaía inclúe este ano varios cambios. O primeiro é o seu traslado do tradicional primeiro sábado despois de Santa Minia pola tarde ao primeiro domingo despois de Santa Minia pola mañá, a partir das 10:00 horas. Outra novidade será que a proba absoluta será a primeira en desputarse: con saída ás 10:00 horas, deixando para a cativada o horario entre as 11:30 horas e as 12:30 horas.
A proba absoluta realizarase sobre un circuíto de 5.000 metros aproximadamente (98% asfalto e 2% terra) ao que se darán dúas voltas. Os circuítos das carreiras de menores terán lugar nas inmediacións campo de fútbol municipal de Brión. Ao finalizar a proba, todas as persoas participantes recibirán un avituallamento líquido na liña de meta.
A XL Carreira Pedestre da Amaía repartirá 1.800 euros en premios e agasallará a todas as persoas participantes con camisetas técnicas conmemorativas. Haberá trofeos e premios en metálico para os tres primeiros homes e as tres primeiras mulleres en cruzar a liña de meta na proba absoluta: 250, 200 e 150 euros, respectivamente.
Tamén se entregarán trofeos e premios en metálico para os tres primeiros clubs federados clasificados, onde os equipos poden ser mixtos. Finalmente, haberá trofeos para os tres primeiros homes e mulleres empadroados en Brión, así como para os primeiros clasificados das 8 categorías establecidas. Os premios non serán acumulativos, salvo os correspondentes aos empadroados en Brión.
Os atletas Hugo García Souto (RC Celta de Atletismo) e Ester Navarrete Santana (Fútbol Club Barcelona) foron os gañadores da 39 Carreira Pedestre da Amaía, na que participaron un total de 303 atletas, 157 na proba absoluta.
