Bisbarra, 24 de outubro do 2022 – O concello de Brión denunciou ante a Garda Civil varios boicots sufridos polo alumeado público e pide desculpas á cidadanía polas molestias sufridas.
O alcalde, Pablo Lago, deu conta no pleno municipal de que encargara un informe técnico sobre a situación do alumeado municipal a unha empresa especializada. Lago dixo que “dese informe podemos concluír que o 90% das avarías son causadas pola manipulación intencionada de diferentes elementos da rede”.
Colaboración veciñal
As avarías segundo o informe non son simples actos vandálicos, senón que buscan causar o maior prexuízo posible tanto para as instalacións públicas como para a veciñanza.
Entre estes actos, que teñen lugar en practicamente todas as parroquias, figuran manipulación de contadores e cadros eléctricos, cables cortados nas arquetas, células fotoeléctricas cortadas, térmicos baixados manualmente, reloxos programadores manipulados… que provocaron que nos últimos meses se incrementaran as queixas veciñais. Sobre todo porque, a pesar de que se reparan as avarías, estas volven repetirse de xeito periódico e nos mesmos lugares.
Diante desta situación, o Concello de Brión puxo os feitos en coñecemento da Garda Civil, que abriu a correspondente investigación. “Solicitamos a colaboración cidadá para que poña en coñecemento da Garda Civil ou do propio Concello calquera información que poida servir de axuda para dar coa persoa ou persoas responsables destes actos e poder así atallar o problema”, indica Pablo Lago, quen lembra que estas avarías “supoñen un gran trastorno para a veciñanza que as sofre pero tamén son un gasto importante para as arcas municipais”.
