займ срочно

Taboleiro dixital de anuncios e axudas para libros de texto no pleno de Brión

0

Bisbarra, 14 de setembro do 2023 – O concello de Brión celebrou o pleno ordinario de setembro que aprobou axudas para libros de texto e un novo taboleiro dixital de anuncios.

Imaxe dun pleno do mes de xunho de este mesmo ano

A sesión plenaria aprobou destinar 10.000 euros á compra de libros de texto por parte das familias do concello. A concelleira de Ensino, Guarina Rey, o confirmou nunha resposta a unha pregunta do BNG.

A concelleira especificou que “estamos estudando como baremalo e imos articular estes cartos a través dos Servizos Sociais”. De feito, o alcalde de Brión, Pablo Lago, lembrou que estes cartos están consignados nos Orzamentos de 2023 para esta función.

Nova ordenanza de administración electrónica

O pleno aprobou por unanimidade a nova ordenanza de Administración Electrónica do Concello de Brión, que vai permitir máis transparencia na xestión municipal. Un exemplo é que o taboleiro de anuncios físico instalado no municipio será substituído por outro dixital na Sede Electrónica municipal, isto fai que calquera cun ordenador teña acceso a el e non precise acudir fisicamente ao concello.

A iniciativa parte da Deputación da Coruña que tamén ofrece a posibilidade de gravar e retransmitir os Plenos municipais. Un punto que coincidía cunha moción do BNG reclamando a gravación das sesións. “É unha opción aberta. A ver que nos achega a Deputación e, en canto sexa posible, gravaranse e emitiranse”, apuntou o alcalde brionés.

Ata entón, o Pleno volveu rexeitar a moción do BNG, que insistía en que fose o Concello quen puxera os medios técnicos e humanos para realizar as gravacións sen ter que agardar á oferta da Deputación. A proposta foi rexeitada co voto de calidade do alcalde, ao rexistrarse un empate a 6 votos entre o PSOE e o PP/BNG, que votaron toda a orde do día de forma conxunta.

Tamén se desestimou unha solicitude de cambio de hora dos Plenos, presentada polo BNG, das 13:00 horas ás 20:00 horas. Porén, o voceiro nacionalista aceptou a “emenda in voce” presentada polo voceiro popular e propuxeron cambiar os plenos ás 18:00 horas. O grupo de Goberno volveu rexeitar a proposta e insistiu na súa dispoñibilidade a adaptar o horario ás necesidades dos concelleiros, sempre que este sexa en horario de mañá.

Finalmente, o Pleno aprobou por unanimidade unha terceira moción do BNG pedindo a creación do Consello Escolar Municipal, despois de que retirara a súa proposta de incluír concelleiros dos distintos grupos no Consello e de que desistira da súa esixencia de que tiña que estar listo o 15 de outubro. O alcalde explicou que “estamos a favor da creación do Consello Escolar pero vendo a súa composición e cambiando os prazos. Traballaremos para que esta listo a finais deste 2023”.

Por primeira vez nas últimas lexislaturas, o grupo popular non presentou iniciativa algunha: nin mocións, ni rogos nin preguntas.

Share.

Comments are closed.