Imaxe de arquivo dun pleno en Brión
O Pleno de Brión aprobou, en sesión extraordinaria, a proposta da Alcaldía para o Plan Único de Concellos POS+ 2026 que destina os 698.441,47 euros a financiar gasto corrente.
O alcalde de Brión, Pablo Lago, dou as gracias ao POS porque “podemos sacar adiante os principais proxectos e actuacións”. O rexedor explica que “estes fondos destinaranse a financiar actuacións de mellora de acceso a núcleos en todas as parroquias, limpeza viaria, alumeado público, parques e xardíns, así como a solucionar os problemas da recollida de lixo coa Mancomunidade, que vén de moitos anos e nos lastrou moito a todos os concellos”.
Así mesmo, o Pleno aprobou destinar os 106.420 euros do Plan Complementario 2026 ás obras de mellora do viario de Guitiande.
A proposta da Alcaldía saíu adiante cos sete votos a favor de PSOE e PP, e as dúas abstencións do BNG. Unhas abstencións que xustificaron no feito de que non se lles tivera convocado a unha negociación previa da proposta do Plan Único e que Brión continúe cos orzamentos prorrogados.
Pablo Lago lembroulles que “cando lles ofrecín negociar os orzamentos estivemos tres meses reuníndonos e despois tamén se abstiveron”, así como que “ao longo do ano se trouxeron propostas a este Pleno dos distintos grupos municipais que serán atendidas en función dos recursos económicos que temos”.
Renova verde
Por outra banda, o Pleno de Brión aprobou por unanimidade delegar no Concello de Ames a xestión e organización do obradoiro dual de emprego Renova Verde. “Despois de varios anos dedicados ás enerxías renovables en xeral, e ás instalacións fotovoltaicas en particular, este ano apostamos por actuacións de mantemento e instalación de xardinería, xa que é unha actuación interesante para ambos os dous municipios e tamén porque empresas da comarca nos teñen trasladado a necesidade que teñen de persoal ben formado no sector”.
Un obradoiro que contempla unha vintena de actuacións de melloras en zonas verdes do municipio brionés.
