Bisbarra, 8 de novembro do 2022 – O grupo socialista de Teo ven de emitir un comunicado no que reclama que se siga a vía civil para intentar evitar o peche da pista da canteira da Casalonga.
O psoe teense reclama tamén que se reúna a comisión especial de seguimento da canteira para “aclarar cuestións, sumar ideas e impulsar a oposición ao peche da estrada da canteira e a recuperación do espazo pola vía que sexa”.
Na nota os socialistas recoñecen que “se trata dun camiño longo e complicado”. O alcalde, Rafa Sisto, na reunión mantida cos veciños a mediados de outubro, falara nuns termos semellantes; que a vía civil sempre se pode iniciar pero que é un proceso moi longo.
O Psoe tamén “ve con preocupación” a rotura de relacións do alcalde coa Plataforma. Un desencontro producido a raíz dun comentario, nunha rede social, do presidente da Plataforma que levou a Rafa Sisto a comunicarlle a rotura de relacións ao colectivo.
