Compostela, 4 de novembro do 2022 – A Fundación Granell presenta unha nova sesión do programa A miña peza favorita, en este caso co comisario de exposicións, crítico de arte e investigador Íñigo Rodríguez.
A peza elixida por Rodríguez é óleo Norte Verdadero do artista Philip West. A partir del o convidado desenvolverá un surrealista e audiovisual relatorio sobre esta obra e a traxectoria do pintor británico. A cita o vindeiro martes 8 de novembro ás 19:00h
Licenciado en Historia da arte pola Universidade de Santiago de Compostela na especialidade de arte contemporánea. Máster en xestión do patrimonio artístico e arquitectónico, museos e mercado da arte na mesma universidade, e, doutorando na universidade compostelá na actualidade toma como campo de investigación a xestión da arte contemporánea galega en democracia e mercado da arte. Íñigo Rodríguez compaxina o traballo teórico na universidade coa actividade de xestión e divulgación cultural a nivel galego e estatal.
En Galicia traballou nos equipos de coordinación de proxectos como Mulleres en Acción, Violencia Zero da Deputación de Pontevedra (2015-2019), Do camiño vivido da Deputación da Coruña (2018-2019), CreaVigo do concello de Vigo (2018-2019), Somos rúa facemos arte do concello de Carballo (2017-2018) ou da III edición da feira de arte contemporánea Cuarto Público (2015-2016).
Curador residente do espazo compostelán Olalab entre os anos 2017 e 2018. Comisariou as exposicións individuais da artista Mery Pais, Máis alá do estereotipo, na Igrexa da Universidade (2019) e a do escultor Óscar Aldonza na súa exposición Golem no espazo vigués A´postrophe (2020). Colabora con artistas internacionais de recoñecida traxectoria como Antonio Briceño ou Patricia Werneck Ribas.
Forma parte da asociación cultural Idea Bat para a defensa da cultura con sede en Madrid, coa que participou na xestión e curadoría do proxecto Pincoyas xunto coa Universidade do Bío Bío de Chile (2021-2022). Actualmente, colabora como redactor e columnista da revista dixital especializada en arte contemporánea Arte a un click.
A miña peza favorita é un programa da Fundación Eugenio Granell que se inicia no 1997 e consiste en seleccionar unha ou varias pezas de entre as que forman as Coleccións da Fundación Eugenio Granell para que o convidado elabore un comentario persoal.
Trátase dunha proposta aberta a calquera persoa interesada tanto na Fundación, coma na arte ou na figura de Eugenio Granell.
