Bisbarra, 10 de xullo do 2023 – O descenso do Ulla celebrouse un ano máis polo tramo do río que discorre entre Boqueixón e Vedra nunha cita que crece cada ano.
Na edición 2023 foron máis de setenta persoas as que participaron no descenso do Ulla. A actividade está organizada conxuntamente polos Concellos de Boqueixón e Vedra. Os participantes percorreron o tramo que separa Ponteledesma e Agronovo, e contaron coa presenza dos alcaldes de ambos os dous municipios: Ovidio Rodeiro Tato (Boqueixón) e Carlos Martínez Carrillo (Vedra).
Unha iniciativa dirixida a persoas maiores de idade, ou de máis de 13 anos con autorización familiar, cuxo único requisito obrigatorio era saber nadar. A cota de inscrición incluía unha praza en piragua de dúas persoas, chaleco salvavidas e seguro da actividade.
