O centro de interpretación do Pico Sacro en Boqueixón acolleu esta fin de semana a sétima edición do ciclo “Un Mes e Pico” na que tamén se avanzou na declaración BIC.
O concello de Boqueixón traballa desde hai tempo na declaración de Ben de Interese Cultural, BIC, do Pico Sacro pero agora quere ir un paso máis alá e conseguirque sexa incluída entre as Montalas sagradas do Mundo.
O alcalde de Boqueixón, Ovidio Rodeiro, avanzou a idea no transcurso da sétima edición de “Un Mes e Pico” celebrada esta fin de semana. O rexedor dixo que “estamos xa traballando para conseguir que o Pico Sacro forme parte das Montañas Sagradas do mundo. Imaxinade: Monte Olimpo, Monte Sinaí, Monte Fuji, Machu Picchu… Pico Sacro. Quen dixo medo!”.
Con estas palabras o alcalde inauguraba a reunión mantida no centro de interpretación do Pico Sacro. “Un Mes e Pico” é unha iniciativa posta en marcha polo Concello de Boqueixón para poñer en valor o monte Ilicino e promover a súa candidatura a Ben de Interese Cultural (BIC).
Rodeiro engadiu “Creo que todos os que estamos hoxe aquí presentes coincidimos en que hai motivos máis que de sobra para que o Pico Sacro sexa declarado BIC. E dende o Concello que presido seguiremos traballando para que ese nomeamento poida producirse o máis pronto posible”.
Conferencias
O centro de interpretación do Pico Sacro acolleu un ciclo de conferencias da man de cinco prestixiosos investigadores co obxectivo de ofrecer unha visión interdisciplinar do Monte Ilicino. Antonio César González García, doutor en Astrofísica, ex-presidente da Sociedade Europea de Astronomía e membro da delegación en Galicia do Centro Superior de Investigacións Científicas (CSIC), falou do Monte Ilicino como referente da paisaxe galega. Algo no que tamén insistiu César Parcero Oubiña, investigador científico no Instituto de Ciencias do Patrimonio (INCIPIT) e arqueólogo especializado na análise do espazo e a paisaxe ao longo da historia.
Pola súa banda, David Fernández Abella, arqueólogo e licenciado en Historia pola Universidade de Santiago de Compostela, presentou os últimos achados arqueolóxicos localizados neste verán de 2025 durante a limpeza do alxibe do Castelo do Pico Sacro, antiga cisterna para almacenar auga desta antiga fortaleza edificada no século XII.
Cristina Sánchez-Carretero, antropóloga, ex presidenta da Asociación de Antropoloxía do Estado Español, vicedirectora e investigadora do Instituto de Ciencias do Patrimonio do CSIC, presentou os avances nos procesos de salvagarda do Pico Sacro como conxunto simbólico senlleiro de Galicia, paso previo á súa declaración como BIC.
Finalmente, Felipe Criado-Boado, arqueólogo, profesor de investigación do CSIC e director do Instituto de Ciencias do Patrimonio, pechou o ciclo analizando como en moitos países mantense memoria viva das montañas sacras, mentres que en Europa perdéronse case sempre. Unha presentación relacionada coa intención do Concello de Boqueixón de buscar a declaración do Pico Sacro como Montaña Sagrada do mundo.
