Este mesmo mes o Servizo de Axuda no Fogar, SAF, comezará a funcionar coa nova empresa. O concello destinará máis de 1,8 millóns de euros, durante os próximos dous anos, a este servizo.
O novo contrato do SAF de Boqueixón comeza este mes e faino coas melloras acordadas na adxudicación. Estas melloras son tanto para as persoas coidadoras, que vén incrementado o prezo por hora traballada e mellores condicións de traballo, como para as persoas que son atendidas no seu domicilio.
O alcalde de Boqueixón, Ovidio Rodeiro, explicaba que “A pesar de que supón un gasto moi importante para o Concello, de máis de 670.000 euros este mesmo ano, e que non é unha competencia municipal, non podemos esquecer que o SAF ten como principal obxectivo mellorar a calidade de vida das persoas usuarias, favorecer a súa autonomía, posibilitar a súa permanencia nas súas casas e previr situacións de exclusión social, polo que o esforzo paga a pena”.
Neste sentido, o alcalde lembra “a aposta decidida deste equipo de Goberno polas actividades de conciliación, tanto para os pais e nais do alumnado en idade escolar como para os coidadores e coidadoras dos nosos maiores”. Así, explica que o novo contrato recolle as peticións realizadas polas traballadoras que prestan este servizo, cun prezo mínimo de 24 euros/hora.
