Bisbarra, 3 de febreiro do 2025 – Os alcaldes de Boqueixón, Ovidio Rodeiro Tato, e de Lalín, Xosé Crespo Iglesias, asinaron un acordo de irmandamento da Festa da Filloa de Lestedo coa Feira do Cocido de Lalín.
O acto tivo lugar en Lalín, na IV Feira Internacional de Apicultura e coa presenza da conselleira do Medio Rural, María José Gómez. Participaron tamén o presidente da Asociación Cultural Festa da Filloa de Lestedo, José Manuel Canabal; o co-oganizador da feira “Alvariza”, David Liñares; o concelleiro de Turismo de Boqueixón, José Luís Mareque; o seu homólogo de Lalín, Avelino Souto; o director do Agacal, Martín Alemparte; e o director xeral de Gandaría, Agricultura e Industrias Agroalimentarias, José Balseiros.
Ovidio Rodeiro agradeceu o traballo tanto da Asociación Cultural Festa da Filloa de Lestedo como do Concello de Lalín para a sinatura deste protocolo xa que “a Festa da Filloa gaña un irmán maior: a primeira festa gastronómica que consegue ser distinguida como de Interese Turístico Internacional. Todo un espello no que mirarse e ao que imitar”.
Así mesmo, puxo en valor os moitos puntos que unen a ambos os dous municipios pois “alguén entendería un Entroido en Galicia sen filloas ou sen cocido? É impensable”, se ben adiantoulles que “aínda que a filloa é unha das sobremesas típicas da Feira do Cocido. Os amigos da Asociación Cultural da Filloa demostraranvos que é moito máis ca un doce”.
Pola súa banda, José Manuel Canabal aproveitou para agradecer a colaboración de ambos Concellos na sinatura deste irmandamento e aproveitou para convidar a todos os presentes a achegarse por Lestedo o domingo 9 de marzo “e desfrutar connosco da Festa da Filloa, que este ano como gran novidade terá unha degustación de Cocido de Lalín”.
Canabal tamén puxo en valor o traballo e implicación dos 220 integrantes da asociación cultural que preside “non so o Domingo de Piñata, facendo quendas nas máquinas filloeiras e nos distintos stands; senón tamén nas diferentes actividades que programamos durante os meses anteriores. Porque o éxito da Festa da Filloa está na implicación parroquial dos veciños e veciñas de Lestedo”.
O alcalde de Lalín salientou que a feira de apicultura “abre as portas á 57ª Feira do Cocido que este ano incorpora unha importante novidade como é o irmanamento da Feira do Cocido coa Festa da Filloa de Lestedo que vimos de asinar este mediodía en Alvariza e que agardamos consolidalo no tempo”.
Crespo salientou que para visibilizar este irmandamento “desenvolveuse este mediodía un showcooking con distintas elaboracións da Filloa de Lestedo e ademais os Xenerais da Ulla, que son unha parte esencial da Festa da Filloa, estarán presentes no desfile da Feira do Cocido o 23 de febreiro. E Lestedo, no seu día grande da Filloa, o domingo 9 de marzo, preparará un Cocido de Lalín como menú principal do seu xantar oficial”.
Finalmente, a conselleira do Medio Rural puxo en valor os produtos galegos e a necesidade de promover o consumo de produtos quilómetro cero, que contribúen a recoñecer o bo facer dos produtores locais e facilitar unha boa relación entre consumidores e produtores.
