Bisbarra, 27 de setembro do 2022 – Boqueixón investirá 4,7 millóns de euros na modernización do seu alumeado público con tecnoloxía LED e na creación de 17 quilómetros de sendas peonís.
Sendas e luminarias serán posibles ao recibir o concello dúas subvencións do programa DUS 5000 do Ministerio para a Transición Ecolóxica e para o Reto Demográfico por 3.913.640 euros. Boqueixón engade a esta cantidade 773.760 euros máis de fondos propios.
O alcalde, Manuel Fernández Munín explica que “Con estas inversións melloraremos a calidade de vida da veciñanza, tanto polo aforro en custes enerxéticos como polo incremento dos itinerarios peonís de cara a conseguir uns hábitos de vida máis saudables”
Mellora do alumeado
Boqueixón levará cabo a modernización da súa rede de alumeado público mediante un sistema de telexestión e a substitución das luminarias coa incorporación da tecnoloxía LED.
Concello pretende reducir a contaminación lumínica e ambiental, así como aforrar en custes ante a suba dos prezos da enerxía, mediante a substitución da totalidade dos puntos de luz de alumeado público por un sistema LED máis eficiente. Actualmente, os núcleos de O Forte, Camporrapado, Ponte Ledesma e Ardesende xa dispoñen desta tecnoloxía LED na súa de rede de alumeado. O proxecto irá acompañado dun sistema de telexestión que permitirá un control directo sobre as luminarias.
Sendas peonís
Por outra banda, Boqueixón executará, grazas aos fondos, 11 actuacións que suporán a creación de 17 quilómetros de sendas peonís en distintos puntos do municipio. A partir deste momento, o Concello ten que redactar os proxectos nos que se definirán os itinerarios concretos das sendas.
Fernández Munín engade que “a execución das sendas peonís supón a ampliación de viarios xa existentes e, nalgúns casos, a cesión por parte da veciñanza para que se poidan executar esas ampliacións. Nos próximos meses redactaranse os proxectos e iremos presentándollos aos veciños e veciñas”.