Bisbarra, 29 de agosto do 2022 – O concello de Boqueixón segue enchendo de actividades o Pico Sacro e prepara unha noite de observación astronómica e unha ruta guiada.
A primeira cita no Pico sacro será o sábado 3 de setembro ás 21:30 horas. Os amantes da astronomía poderán observar a Lúa crecente, Xúpiter, Saturno e estrelas dobres. A xornada estará guiada polos integrantes do equipo do Observatorio Astronómico Ramón María Aller (OARMA) da USC.
Trátase dunha actividade gratuíta organizada polo Departamento de Educación e Cultura do Concello de Boqueixón, en colaboración co Observatorio Astronómico Ramón María Aller e Turismo de Galicia –dentro do programa O Camiño das Estrelas. As estrelas do Camiño, O teu Xacobeo–.
As persoas interesadas en participar deben anotarse no Departamento de Cultura, no 981 51 31 15.
Ruta guiada
Ao día seguinte, o domingo 4 de setembro, o Concello de Boqueixón ten planeada unha ruta guiada gratuíta baixo o nome de “Unha volta ó Pico”. A saída está prevista para as 9:30 horas desde a igrexa de Santa María de Lestedo.
As persoas que participen terán ocasión de visitar o Pico Sacro, o antigo cemiterio de Lestedo e a igrexa da Granxa. O itinerario rematará no campo da feira de Lestedo e terá unha duración aproximada de 3 horas. Para ampliar esta información, poden contactar co 981 513 061.