Bisbarra, 11 de novembro do 2022 – O BNG de Vila de Cruces denuncia o estado de abandono no que se atopa a Casa da Carixa e falta de cumprimento dos acordos tomados en pleno hai un ano.
A Casa da Carixa foi mercada no 2018 polo anterior goberno do Partido Popular. Trátase dunha construción circular adaptada como vivenda e que se pretendía dedicar a un centro de promoción turística e aulas didácticas para cativos.
Esa proposta nunca se realizou e hai un ano o BNG presentou en pleno unha iniciativa para o uso de distintas instalacións públicas en desuso. Unha das propostas era a Casa da Carixa, para que fora usada polas asociacións que o precisasen. A proposta foi aprobada por unanimidade.
Os nacionalistas denuncian que na actualidade, un ano despois, a proposta nunca foi levada á práctica e as instalacións están abandonadas. Mesmo pódese atopar a Carixa cunha fiestra aberta e a luz acendida todo o tempo.